現年62歲的鍾鎮濤疑墮陷阱！身為苦主的他開腔數臭李悅彤（Liddy）疑似新歡鮑偉業（Ivan），阿B自爆兩人曾合作搞電影，其後他發現有問題，懷疑有人利用他的知名度融資，阿B損失了7位數字，已備案處理！不過，Ivan昨晚發表聲明，指阿B疑針對他本人斂財等的言論，並不屬實。
李悅彤與人夫彭順斬纜後，上週五被本報影到孖斯文男遊銅鑼灣，兩人撐完枱腳上酒店。事件曝光後，有讀者爆料斯文男名鮑偉業，已婚兼育有一子，有指他是澳門富二代，與圈中人熟稔又名銜多多，包括今年5月成立溫得富影視傳媒公司，當時鍾鎮濤都有出席發佈會，去年他更到峇里出席阿B和范姜的婚禮，怎知兩人疑因財反目，阿B前晚接受本報電話訪問，公開數臭Liddy新歡，昨晚Ivan發聲明否認阿B的指控！
交代唔到玩失蹤
阿B透露與Ivan合作出問題，他說：「之前我哋有生意上合作，我知佢結咗婚有一個仔，以為佢份人好老實，所以合作過幾次，開頭都OK，後來有單嘢發覺唔妥，自己都喺微博發過聲明。」今年7月，阿B在微博貼律師聲明函：「創圓資本利用鍾鎮濤先生知名形象進行不實宣傳的行為，違背誠實信用原則，其結果侵害了鍾鎮濤先生的名譽權。」
阿B又懷疑Ivan利用了他的知名度，他說：「我發現有人用我個名融資外面嘅錢，佢話畀我知，有人有興趣搵我合作投資搞電影，我做籌備拍戲部份，佢就負責做財務，但好多嘢交代唔到，問佢時佢竟然叫我同佢律師講，我覺得好奇怪，問佢邊個律師，佢又話唔會講，之後就玩失蹤。」
問阿B有否損失？他坦言：「有，籌備拍戲啲錢係自己投資嘅，損失咗7位數，但係一毫子都追唔番，我已經去咗備案，仲通知埋其他行家同朋友。」
Ivan昨晚發聲明：「就鍾鎮濤先生懷疑有人利用其名字斂財和使其受騙等針對本人言論並不屬實。」Ivan又指阿B提及的「律師聲明函」，他不是信函中談及的公司成員，所以有關不恰當的言論已對他名譽構成嚴重影響，並將此事交由律師處理，保留法律追究權利。
今年5月Ivan成立的溫得富影視傳媒公司舉行發佈會，當日阿B都有現身出席。
阿B與lvan（左）相識數年曾有生意上合作，上年阿B在峇里舉行婚禮都邀請對方出席。資料圖片
上週五Liddy被影到孖人夫Ivan遊老銅，之後兩人更上了酒店。
Liddy撐待人真誠
繼阿B數臭Liddy新歡後，昨日本報收到讀者爆料，聲稱有朋友投資出現問題，指朋友投資了8位數字拍攝阿B的電影。昨Liddy接受電話訪問，力撐Ivan：「作為朋友，以我對佢嘅瞭解，佢嘅人格唔似鍾生所講有任何呃人嘅成份，我覺得佢對朋友對任何人都係真誠嘅。至於佢哋兩個之間嘅問題，我就唔方便作出任何回應，我同佢係普通朋友關係。」問會否減少與人夫Ivan聯絡避嫌？她說：「作為朋友我覺得冇話避唔避嫌，身邊朋友有男有女，我都會同佢哋出去hang out。」
採訪：皓騫
from:
http://hk.apple.nextmedia ... 151103/19357430
