鍾鎮濤做總監、冼國林投資15億人民幣喺廣東開嘅「好娛樂頻道」，噚日喺紅磡海逸君綽酒店搞記招，有唔少圈中友好撐場，冼國林新愛將周嘉莉就「露底」贈興，而有傳掛住拍拖被雪藏嘅陳嘉桓就露背上陣。台上嘉賓都係講恭喜說話，惟獨曾志偉唱反調，好抵死咁話：「一睇就知呢個電視台係黑暗喇！不過我都考慮出嚇唱片先，譚詠麟唔係話唔攞獎咩？健仔個獎keep好啲，梅艷芳啲獎拍賣百幾萬㗎！」
呢個頻道有乜嘢特色？總監阿B話：「市場好大，內地點擊率有十億以上，我哋嘅優勢係有廣東話製作，推動電影歌曲同藝人，係一個好好平台，一個廣東省就有過億人口。」
朱慧敏和彭懷安這對過氣戀人，噚日要搵老闆冼國林喺中間先肯合照。
周嘉莉噚日露底現身記者會，為冼國林投資嘅娛樂頻道贈興。
3月有節目睇
至於睇呢個頻道使唔使錢呢？投資者冼國林話：「頻道已經運作緊，大家可以喺手機、電腦、平板電腦睇，3月份就有節目播喇。收費有唔同方法，網劇頭十集唔使畀，之後要畀，市場有我哋都會做，同埋有優惠價。」
同場嘅過氣情侶朱慧敏同彭懷安（Eddie），𠵱家佢哋只限於生意上嘅拍檔，訪問都係各自各講工作，講到翻撻嘅可能性？Eddie話：「一切隨緣喇！」而憑良心講真話，得罪新老闆司榮彬慘遭雪藏嘅蔡國威話：「自己噚日先落機，唔知亞視發生乜嘢事，有同事話未收到12月份薪金，情況都令人擔心，管理層要解決事件，如果入咗數，藝員科會講聲，但我就未收到通知囉。」
撰文：馮仁昭
馮仁昭
from:
http://hk.apple.nextmedia ... 160128/19468912
