人生70古來稀，61歲的鍾鎮濤（阿B）仍然有心有力，決定再做「老襯」，8月與拍拖17年的女友范姜完婚。據知阿B會於海外行禮，斥資七位數字搞派對，二人所生的女兒鍾懿與鍾幗將會擔任花女，並邀請近百圈中好友齊見證，鐵腳包括溫拿好兄弟及關之琳等。
現年61歲的鍾鎮濤與來自台灣的42歲范姜素貞，育有9歲大女鍾懿及4歲細女鍾幗，阿B終於決定今年8月完婚，結束17年愛情長跑，展開他第二段婚姻生活。二人的好友近日陸續收到邀請，由於婚禮將會於海外舉行，地點依然保密，只同友人表示由於地方沒有直航到達，故要遷就近百圈中好友檔期才鎖定日子。婚期由原定的8月底一改再改，亦有傳是8月14日，但一對新人應該未揸定主意，好友都紛紛等通知。
阿B在圈中廣結好友，據悉不少好友如溫拿、陳國熹葉童夫婦、杜德偉、呂方、梁朝偉和關之琳獲邀請，而范姜的好友周汶錡、周麗淇姊妹也是賓客之一，估計婚禮派對斥資七位數字。
兩女兒擔任花女
阿B於88年與章小蕙結婚，97年宣佈離婚，同年與當時任助手的范姜開始戀情，到99年與章辦妥離婚手續，結束11年婚姻，而阿B與范姜同居，歷年來都如恩愛夫妻般相處，去年他成功向女友求婚，更送上五卡鑽石戒指。阿B選定8月再婚，主要考慮四名子女的檔期，當中遷就三名女兒放暑假，而他與前妻章小蕙所生的一對子女鍾嘉浚及嘉晴會出席，他與范姜所生的鍾懿與鍾幗更會做花女。
其實阿B與范姜拍拖多年，十分感激女友與他共患難，尤其他與前妻章小蕙投資房地產失利，欠債過億而破產的艱難日子，范姜對他不離不棄，肩負重組他的事業及幫他照顧嘉晴，更旺他事業再度起飛。
阿B近年不時與譚詠麟等溫拿合體巡迴演唱、返內地拍劇掘金，近日更自組公司，日前本報記者於大坑遇到他與兩位男友人嘆茶密斟，當中齊齊研究電腦內的文件，傾足一個鐘。記者昨日致電阿B求證8月結婚消息，他笑着說：「唔係呃你，都未定到日期，自己忙到死，啱啱開咗隨風文化傳播公司，搞電影、演唱會、經理人部門，自己都有幕前演出做騷，今日就去昆明做世界盃前奏，工作排到年底，未知幾時搞到婚禮。」
阿B與范姜育有兩女兒，包括9歲的鍾懿與4歲的鍾幗，精靈可愛。
近日阿B（左）忙於自組娛樂公司，日前約同男友人密密斟。
鍾鎮濤與阿倫合體的溫拿，近年四出巡迴演唱掘金。
「成日俾鍾懿催婚」
記者再問阿B婚期會否是8月14日，他坦言：「以前計劃過，但日子改嚟改去，都唔記得咗，𠵱家唔敢定住日期，但成日俾鍾懿催婚，希望趕到今年，唔係我唔娶佢，要佢嫁我先得，我都希望快快趣趣，到時你會知。」問他會否大搞婚禮？夢想婚禮又是怎樣？他說：「未知，我冇乜夢想，定咗日子先。」范姜昨日在電話回應本報記者，亦與阿B同一口徑：「大家唔得閒，飛到癲咗，𠵱家未有打算，仲好多工作做，要一路計劃，都仲諗緊，去邊度都未諗到。」
此外，溫拿隊友彭健新被問到知否阿B結婚？他透過電話說：「佢成日都話要有個交代，兩個女都生咗，結婚應該嘅，佢一定要話畀譚生（譚詠麟）知，我都要攞定假，恭喜佢，最好結婚嗰晚通宵夾band。」
採訪：唐如、梁繼光、畢紹基
From:
http://hk.apple.nextmedia ... 140501/18705874
