去年離開無線後，高鈞賢返內地拍劇，一集劇酬已抵得上大台月薪。搵到錢，但為了進軍飲食界在荔枝角開居酒屋，圓多年心願，他寧願放棄心頭好，將波子戰車變賣套現。新店正在裝修，高鈞賢返港睇場落手換燈膽，親力親為。
親自督工離開大台只有短短九個月時間，簽了內地經理人公司的高鈞賢，已接拍兩部大陸劇，劇酬每集二萬人仔，拍一集已幾近以往在大台二萬五月薪，加上商演真人騷登台，十分和味。
北上發展有錢途，有投資開車房的高鈞賢最近再同朋友夾份在荔枝角開居酒屋，玩多瓣。
專程由內地返港睇裝修的高鈞賢，日前一身背心開工look落鋪監場，由後門鐵閘到天花燈飾逐一檢查，又不時同裝修師傅討論研究，甚至落手落腳換電燈膽，事事上心。
上週三，高鈞賢跟工人傾完一輪後，又親自換燈膽，由於天氣太熱，他食住雪條開工。
去年，在大台冇乜工開，高鈞賢也有在朋友車行打工幫手，他更放下身段出外買外賣，跟同事齊齊捱飯盒。 三年後結婚對於進軍飲食界，高鈞賢說：「而家喺內地發展幾OK，收入唔錯，但做娛樂始終唔穩定，我想多方面發展。開居酒屋都係我多年夢想，因為本身喜歡同朋友去居酒屋食嘢，間鋪大約有一千呎，同朋友夾份，自己要攞六位數出嚟。我而家連架Porsche（保時捷）都賣埋，要專心打理生意，唔好再花時間去玩，所以賣咗出去攞番啲錢好過。」
未來鋪曬路，高鈞賢亦計劃三年後同圈外女友Chika拉埋天窗。
「我今年三十一歲，三年後係適合嘅時間去組織家庭，我已經認定女友係結婚對象，所以而家努力儲緊錢；婚後希望可以住近父母，方便照顧。」高鈞賢說。
在內地拍了《愛的婦產科2》，近日劇集成為同時段冠軍，人氣因而提升。
離大台後，內地經理人即替他接了古裝劇《山海經之赤影傳說》，他演反派角色，戲份頗重。
05年奪香港先生冠軍入行，不過在大台九年，愈來愈少工作，更試過做路人甲大茄角色。
今年初趁空檔，他帶阿媽一齊做有線節目《帶阿媽去旅行》，母子倆同遊埃及。
視Chika為結婚對象，他也不介意將親密拍拖照放fb，大方公開戀情。
跟拍拖兩年的Chika孖住賀葉翠翠婚宴。 走得好大台出手低，不少藝人紛紛離巢自救，大部分出走後都發展不錯，活得比以前更好。
郭政鴻
月前「傾掂數」提前解約，即有內地製作公司開出年薪過百萬利誘郭政鴻加盟，大馬方面亦招手搵他拍劇，人工三級跳。
楊思琦
不滿大台欺壓，去年約滿走人的楊思琦中港密密搵，為有線主持清談節目《往事並不如煙》，接拍內地劇《暗戰危城》，連同登台、廣告，吸金超過500萬，等如無線多年人工。
