現年30歲的首屆香港先生高鈞賢，在無線捱足9年有名冇利，月入只有$25,000的他試過被凍薪，近年更越做越黴變二打六，連拍劇非禮阿婆、上節目講痔瘡都要做，一度令他患上抑鬱症。九年青春流逝不返，高鈞賢決定約滿後北上賺人仔，昨日最後一天返無線執包袱，終於唔使再扮色魔。
九年前只有21歲的高鈞賢，由加拿大返港參加首屆香港先生選舉，以大熱姿態勇奪冠軍，獲司儀鄭裕玲高度讚揚，並跟無線簽下八年長命約。以為從此一帆風順的他，怎知越做越黴，由第二男主角淪落到二打六的角色，他昨日慨嘆說：「我都唔知點解，做咗好多非禮女人角色，喺《寒山潛龍》要非禮阿婆㖭，甚至有節目講生痔瘡，我好唔想去做，但係覺得作為簽咗合約嘅藝員，做番應份嘅嘢，我都有去做。」多年來被無線投閒置散，高鈞賢終於決定約滿後離巢，不再依靠大台有名無實的遮蔭，孤身北上內地發展賺人仔。
曾獲港男冠軍的高鈞賢近年工作量不多，出席活動時還要配合被魯芬強吻。
資料圖片
高鈞賢在劇集《寒山潛龍》做配角，飾演老千的他更要非禮阿婆。
劇照
中文唔好 監製嫌棄
昨日是高鈞賢在無線的最後一天，約下午3時許，他駕駛二手波子返公司執包袱，紙皮箱載滿他九年的回憶，包括粉絲為他拍攝及多年來在無線拍下的相片，還有外套、籃球等，同事知道他離去，送了一本TVB週刊給他留念，高鈞賢還特別買了一份下午茶，品嚐在無線的最後一餐。
高鈞賢昨日用紙皮箱帶走fans送的相簿、外套、籃球，還有在無線買的最後一份下午茶。
在無線越做越黴，高鈞賢曾問家人借錢入股車行，現業績不錯，可以揸二手波子出入。
問到為甚麼離開大台？高鈞賢說：「喺加拿大睇無線劇覺得幾過癮，盲舂舂返嚟做咗香港先生，可以話夢想達成，嗰時好開心，好多人認識我，無線都畀一份好吸引合約我，自己感覺好有衝勁，二話不說籤咗八年，即刻同家姐一齊供樓供車，當時$15,000人工，將軍澳層樓300幾萬，都有少少博。初時有好多唔同工作，拍劇、節目，之後拍古裝劇《幕後大老爺》做第二男主角，自己中文水平二年班，要攬住劇本瞓覺，雖然不斷努力，但達唔到監製理想，好多監製怕咗用我。」
知恥近乎勇的高鈞賢，花錢請教戲老師學演技，雖然自覺有進步，但工作卻越來越少，他說：「到第五年公司同我講，呢一年差咗啲，所以呢年合約要凍薪，但要加簽一年，當時人工去到$25,000，自己想喺呢行繼續做，同公司講唔要求做主角，希望慢慢進步嘗試，公司話OK，所以簽咗呢份約。」怎知之後幾年公司卻將他投閒置散，他說：「好多街坊問呢排做緊乜？我好想答佢哋，但答唔到！」
高鈞賢的儲物櫃，載滿他與無線的9年回憶。
交還藝員證前，高鈞賢特別來化妝間走走。
昨日高鈞賢執拾時遇到麥玲玲，獲贈言事業有新發展。
呻藥費貴 唔醫抑鬱
由於要供樓供車供保險，生活壓力令他透不過氣：「嗰時諗係咪真係要繼續呢？懷疑自己係咪有抑鬱，因為唔敢出去面對人，嗰段時間冇乜工作，每月咬住得三、四千蚊使，死撐冇同任何人講，我有睇醫生，但每次藥費$1,000太貴，最後決定自己解決。嗰排冇工開成日打籃球，有次腳傷入院，好深刻係父母嚟探我，阿爸問我攞銀行戶口睇，我即刻喊咗出嚟，點解畀唔到更好屋企人，當時戶口剩番五萬蚊。」
高鈞賢為堅持在這行發展，甚麼角色都肯做，問對無線是否很失望？他說：「大家timing唔夾！自己畀咗九年時間，公司最尾一年先挽留同加人工，令我喺好唔開心同惆悵狀態下離開。呢九年雖然有啲時間浪費咗，但畀到我經驗同經歷，𠵱家30歲選擇呢一步，希望有新開始，之前去咗北京，有幾間經理人公司都想簽我，其中一間條件唔錯，呢兩個月自由身，享受鬆一口氣感覺，之後會上北京定居同做嘢，重新出發。」
麥玲玲昨在電視城見到高鈞賢，祝福他有新開始，麥師傅說：「佢屬鼠今年沖太歲，適宜走動去凍地方，命格今、明年事業有新發展，但小心協調人事。」
採訪：皓騫
From:
http://hk.apple.nextmedia ... 140911/18861952
