07年香港先生袁偉豪，捱足9年，年初終於喺《鐵馬戰車》執到好籌，飾演生鬼「施馬sir」，成功入屋，到早排播完嘅《城寨英雄》做「牙佬」一角，受師奶熱捧，3線尾晉升2線頭。
不過，香港先生未必個個好似袁偉豪咁，時來運到有得發揮，綜觀歷屆冠軍，許家傑、翟威廉同李晉強，雖然簽約俾大台，不過大部份都只係做人肉佈景版，想發圍，真係唔知仲要等幾耐！
05年 高鈞賢
05年開始，大台學人搞《香港先生》選舉，最初係威係勢，冠軍高鈞賢隨即簽約成為旗下，可惜捱足9年有名冇利，往後幾年更越做越霉變二打六，連拍劇非禮阿婆、上節目講痔瘡都要做，一度令佢患上抑鬱症。14年高鈞賢決定約滿後北上搵人仔，之前更憑古裝劇《山海經之赤影傳說》彈起。
06年 黃長發
黃長發當選後，幕前幾乎係零演出，最為人知嘅反而係情史，09年佢因為教法文而搭上比自己大16年、同鞋王劉劍群有個5歲女嘅三奶Karen，之後黃長發宣告半退出娛樂圈，轉行做會計師。近年佢喺Elite模特兒公司做經理。舊年佢同捷克籍模特兒女友Zuzana結婚，做埋老襯。
08年 朱允崇
來自美國嘅朱允崇，憑住健碩身形加冧死人笑容，賽前已被視為頂頭大熱。決賽當晚，更引嚟伍姑娘(伍詠薇)熊抱獻吻。不過朱允崇當選後，決定唔簽無綫加入娛樂圈做藝人，從此消失幕前。
09年 許家傑
喺幕前撈足7年嘅許家傑，幾乎做親都係大茄，到今年《火線下的江湖大佬》，憑住「蛋撻」一角，先叫做認得吓佢。反而之前有指佢介入龔嘉欣同鄧健泓做「第三者」，搞到佢哋分手，就最有印象。
10年 翟威廉
身為前亞視藝人嘅翟威廉，頭幾年喺大台行行企企，做吓旅遊節目，至於喺劇集做嘅角色，老實講，不堪一提。直至近兩年，角色先稍稍有啲份量。反而係佢多年甘心做陳庭欣隻「兵」，令佢獲得意外嘅曝光率。
11年 李晉強
李晉強當選後，同樣步幾位前輩後塵，又係喺劇集做吓三打七，到近年越做越霉，喺《超能老豆》同《巨輪II》，前者做籃球隊隊員，後者做酒客，連角色名都冇……好陰功！
from:
http://hk.apple.nextmedia ... 160928/19783924
