擁有36G「人類最強body」的崔big瓜（崔碧珈），今年夏天竟然冇好好利用天賦本錢，盡騷G奶身材，白白錯失性感凸圍大好機會。
事出必有因，原來在過去四個月，崔碧珈因為甲狀腺出問題，導致嚴重水腫，個樣腫過豬頭，加上開工集中唔到精神，每日要瞓超過十六個鐘，被迫要全面停工閉關養病。
崔碧珈上年冬天考咗個健身教練牌，向來鍾意做運動嘅佢，依家為咗修身，每日都會喺屋企用TRX狂操。
一度擔心自己會因病失業，崔碧珈回想當日病情一講即爆喊，好彩而家已經好番，body比之前更fit外，事業心與事業線亦變得更強。
停M幾個月有「新波霸」封號的崔碧珈，自從五月底出席完「華鼎獎頒獎禮」後，突然消失得無影無蹤，直至上星期才有消息傳出，指她壓力爆煲情緒出問題，加上荷爾蒙失調搞到停經，塊面腫到變pizza面。
星期一（七月二十日），崔碧珈終於現真身親自解開失蹤之謎。當日記者所見，著住性感運動形bra top，36G加半呎長事業線，崔碧珈狀態返曬嚟。
「其實喺四月嗰陣，已經察覺到身體有問題，去到五月尾喺『華鼎獎』行紅地氈，雖然只係行一段好短嘅路程，但我都應付唔到，尤其對住啲燈光同鏡頭，我完全focus唔到，同埋水腫情況好勁，我係一個以身形去引起觀眾關注，但（身材）變成咁，我都好心噏，所以當晚即刻問經理人可唔可以放假。
「最初我以為係荷爾蒙失調，因為幾個月冇嚟M，走去搵婦科醫生，打咗啲荷爾蒙針，點知都係唔得，醫生就轉介我去醫院驗曬子宮抽埋血，終於知道原來係甲狀腺出事，指數比正常低咗幾度。」崔碧珈說。
因為有病搞到一副腫樣，崔碧珈驚因此會嚇親老細同導演，所有工作會被飛，驚到忍唔住喪喊。
每日瞓十六個鐘失蹤兩個多月，崔碧珈除了睇醫生之外，全部時間都匿埋屋企，唔想出街見人。
「呢段時間，我每個星期要去見一次醫生，其餘嗰六日就喺屋企瞓，連美容院同gym都冇去，每日要瞓十六個鐘，每晚十點瞓到第二日晏晝兩三點，一起身食啲嘢睇套戲，之後又再瞓，根本唔想化妝出街。」
上星期崔碧珈被影到病發時腫口腫面病樣，塊面腫脹程度相當嚴重。（《蘋果日報》圖片）
五月底，崔碧珈死頂同Paco出席完活動後，終於頂唔順要休息醫病。 失控爆喊據知，太陽娛樂揸fit人Paco，原本有曬鴻圖大計，想今個暑假全力谷起崔碧珈，除了寫真，仲會出一隻健美DVD，還有一連串泳衣騷及兩部電影，一心想打造崔碧珈成為性感女神，可惜身體唔爭氣，令全盤計劃要取消。講到呢度，崔碧珈忍唔住當場爆喊。
「喺冬天嘅時候，我好期待今年夏天，因為知道公司plan咗好多嘢俾我，講真，當日放棄唔做banker，唔讀埋個master（碩士），我梗係想喺呢行有更好嘅發展，唔想柴娃娃玩兩年，或者搵個有錢佬嫁咗去就算，如果係咁我唔會咁投入我嘅工作。今個夏天我係miss咗啲job，例如書展都完咗啦，寫真都冇影到，但公司好體諒我，就算我俾人影到好肥腫嘅樣，公司都話之後keep番好就冇問題，但係我好驚我本身俾人個形象會幻滅咗，同埋啲導演見到，會即刻fade out咗我個角色，或者啲廣告同job會冇咗，所以我會好擔心。」
好在經過兩個月西藥療程，崔碧珈的甲狀腺指數以及經期問題已經回覆正常，樣貌同身材亦重整旗鼓，目前她正積極做健身操fit，同時以中藥調理身體，到八月便會正式復工拍電影，全面收復性感失地。
崔碧珈學《激戰》嘅張家輝玩Battling Rope（戰繩），相當有睇頭，唔信嘅話，即刻去「壹週Plus」睇片啦！
因為啱啱好番，崔碧珈開始睇中醫，又搵營養師調理身體。
崔碧珈同岑麗香、Jeana合演嘅《辣警霸王花》，原本喺暑假上映，不過因為後期趕唔切完成，否則崔碧珈唔知可唔可以出嚟宣傳。
放棄唔讀Master，寧願做性感女星嘅崔碧珈表示自己唔係玩玩嚇，希望事業有一番作為。
崔碧珈喺《壹獄壹世界》裡面同王宗堯有車震「動作」戲，佢表示從來唔介意走性感路線。
原本今個夏天，崔碧珈會推出水著寫真，點知病咗，如果唔係羅霖書展有對手啦。 花旦殺手位於頸部前下方的甲狀腺，是人體的一種內分泌腺，主要分泌甲狀腺荷爾蒙，是身體新陳代謝、生長和發育不能缺少的元素之一。其中甲狀腺功能過高症（Hyperthyroidism——即甲狀腺功能旺盛，不按身體的實際需要，大量分泌甲狀腺素，造成細胞的新陳代謝過程過速的不正常生理現象），和甲狀腺功能過低症（Hypothyroidism——甲狀腺功能不健全，甲狀腺素分泌不足）最為常見，情況多來自精神過度受刺激，如悲傷、憤怒、驚嚇、恐懼等，而兩者亦大有可能經由遺傳所致。服用藥物，配合充足睡眠和休息，加上注意飲食，痊癒機會極高。
張可頤
06年在國內拍罷電視版《長恨歌》，因未能抽離角色，加上返港後發現愛犬病逝，不幸出現抑鬱症同時，更導致甲狀腺分泌失調，患上甲狀腺炎，令她頸腫面腫，要全面停工往澳洲靜養，至09年才正式復工。
袁詠儀
魔童出世後，全副心機放在囝囝身上，導致壓力過大，甲狀腺功能失調，面腫、頸腫，體重由115磅上升至125磅，要食三個月藥，令生育大計被迫押後。
苟芸慧
13年同城城合拍廣告後，被指介入天王同熊黛林的戀情，令兩人分手，苟姑娘不堪壓力，導致甲狀腺功能減退爆肥，有傳高峰期重達170磅，至今仍未修身成功。
朱千雪
12年獲選港姐季軍後，兩年連拍五劇，劇接劇休息不足，加上屬演戲初哥，承受無比壓力，最終患上會眼凸頸腫、經期失調的甲狀腺功能減退症，拍罷《警犬巴打》後要全面停工，回加拿大養病。
