蔡思貝有著名跑步教練吳輝揚指導十多年，昨日跑半馬是女藝人成績中最好。
一年一度渣打馬拉松昨日舉行，吸引逾20位藝人參加，過去兩年未見蹤影的徐濠縈，今年再次參加全馬賽事，但就嘆慢板全程吹水及拍照，輕輕鬆鬆去跑，結果以4小時16分33秒完成，比前年成績慢了約23分鐘。半馬賽事方面，以馮允謙1小時37分40秒成績最好，但蔡思貝亦毫不遜色，憑1小時47分44秒撼低湯怡和崔碧珈等，於女藝人成績中稱冠。
採訪、攝影：黃曉妍、王連連、羅慧敏、卓寶花、仇志德、陳慧安
【半馬】崔碧珈負傷上陣唔放棄
蔡思貝、湯怡、崔碧珈、林芊妤（Coffee）、彭浩翔、馮允謙、徐榮、C AllStar成員梁釗鋒和陳健安等，昨日順利完成渣馬半馬賽事，成績最好是1小時37分40秒的馮允謙，而蔡思貝以1小時47分44秒完成，是女藝人中成績最好（詳見附表）。
蔡思貝賽後表示跟跑步教練吳輝揚學跑十多年，之前在外國讀書時也會回港參賽，她說：「入咗娛樂圈後，瞓覺都冇時間，𠵱家我26歲，但身體好似3、40歲，因為唔夠運動，喺廠經常吹冷氣，個人好虛，所以趁後生操吓體能。」問明年可會參加全馬？她表示：「全馬係唔可以僥倖，要做足準備，噚晚眼光光，個心卜卜跳，好緊張，好想快啲完成，所以係興奮到瞓唔着。」
馮允謙以1小時37分40秒成為藝人跑半馬成績最好一個。
林芊妤昨日和男友一起參加渣打半馬，但男友怕醜不肯上鏡。
伍家謙亦有份參加半馬，但成績一般。
湯怡目標求嫁
第二年跑半馬的湯怡以1小時55分52秒完成，比往年快了10分鐘，她有意明年挑戰全馬，問如果她明年與男友洪卓立一起跑全馬，會否順道叫男友求婚？她甜笑說：「我跑完之後就向佢求婚啦，其實叫佢出年喺終點等我都得，咁會好似有個目標。」
湯怡笑言明年挑戰全馬，並會反過來向男友洪卓立求婚。
崔碧珈昨日凌晨到場拉筋跑步熱身，卻發現忘記帶號碼牌。
參加半馬的彭浩翔感激學生擺檔派水果打氣支持。
崔碧珈比往年慢了近19分鐘，早有心理準備成績不及往年的她說：「前一、兩日我夜晚喺公園諗住拉筋郁動吓，途中要避狗屎就扭開，點知就着地流血扭親，膝頭又擦損，條褲磨擦會痛，唔急得只能量力而為，但唔會放棄。」昨日她到達場地後發現忘記帶號碼牌，結果要找家人飛的送來，認真大懵。彭浩翔說：「最難係葵涌嗰條路，之前都有操練，平時都係跑10K同11K，好開心有啲大學生擺檔口畀參賽者食番茄同提子補充糖份，仲有葡撻，不過我覺得太過份喇！」
【全馬】胡諾言太夜瞓有驚無險
胡諾言昨日在藝人全馬成績中最好。
昨日參加全馬的藝人不多，只有胡諾言、「肯雅徐」徐濠縈、周子駒、DJ當奴唐劍康和細So蘇耀宗等，當中以胡諾言成績最好，以3小時43分42秒完成，至於兩年沒跑渣馬的阿徐，昨日就嘆慢板抱着輕鬆心情去跑，最終以4小時16分33秒完成。
阿徐女送抱支持
阿徐說：「傾住偈去跑，同幾個朋友，頭先喺西隧口見到自己個廣告，有停低影相，又有同啲參賽fans影吓相，今日嘅時間未必同平時一樣咁快，平時應該快啲，今日冇睇時間去跑。今日都係有啲辛苦，雖然話全程有輕鬆吹水。」記者笑指吹水功無人能及得上她老公陳奕迅，她即笑言：「佢唔跑得，因為大家唔同公司，即係代言嗰個，囡囡本身都嚟，不過怕混亂，今朝都畀咗個擁抱我，以示支持。」
徐濠縈（右）邊跑邊跟人吹水和合照，所以完成時間比之前慢許多。
參加全馬的當奴跟徐濠縈差不多同時間衝線。
胡諾言今年成績比往年好，但他表示明年未必再參與，希望等兒子長大後可以一起參與。他又表示今次參賽其實有驚無險：「本來噚晚10點瞓覺，點知阿仔喺度喊，阿女又叫我，搞到1點先瞓，4點要嚟到準備，不過今年有呢個好成績，當係一個交代，我希望一眾crazy runner兄弟姊妹今晚頒獎禮可以得償所願。」
【十公里】余德丞再戰十公里贏晒
余德丞賽前熱身，結果以49分鐘成為十公里成績最好藝人。
參加十公里賽事藝人今年不多，只有林奕匡、Super Girls成員吳嘉熙、無綫藝人余德丞及鄧佩儀，眾人中以余德丞的49分鐘成績最好。余德丞昨日凌晨4時許已抵達北角東廊賽事現場拉筋熱身，他賽前受訪時表示第二次參加渣馬：「14年第一次跑，當時成績係52分鐘，好多女仔都快過我，事隔4年，想再挑戰自己。」
（左起）馮允謙、鄧佩儀、吳嘉熙和林奕匡鬥志十足。
首次參加十公里賽事的鄧佩儀，以1小時2分2秒完成，她說：「我預咗個半鐘，因為訓練嘅時候，我跑唔過6K，可能今日天氣同環境，又有大班人一齊跑，令我好興奮。」是否再挑戰十公里？她說：「10K對我都好勉強，如果要參加半馬或者全馬，就要花更多時間，前日我感冒，食藥加休息，今朝氣管都還可以。」
霍啟剛爆仔似媽拒服輸
中曦在與父親霍啟剛和母親郭晶晶陪伴下參加家庭跑。
添馬公園昨日舉行渣馬「家庭跑」，吸引霍啟剛與太太郭晶晶帶同大仔中曦，以及九倉主席吳天海及家人和黃長興一家四口等現身參加。雖然短短400米路程，但霍啟剛囝囝中曦表現落力，由父母一左一右傍住齊齊跑，場面溫馨。霍啟剛賽後說：「上一次係跑3K，今次輕鬆啲啲，囝囝冇停過，佢唔鍾意輸，似阿媽嘅心態，上次跑嘅時候叫佢攰就休息吓，佢會講『唔可以停㗎，停就會輸』，呢個唔係我嘅天份，係媽咪嘅，天生。」
問可擔心囝囝長大後會有很大壓力？霍啟剛表示不會：「起碼有嗰個心唔會半途而廢，挫折一定會有，老師成日講要教佢承受挫折，成日贏就冇面對挫折、失敗嘅心。」此外，黃長興昨日一家四口現身時，細仔額頭貼上膠布，原來是日前發生小意外，導致穿頭要入院縫了5針。
李拾壹賽後冇唞即表演
李拾壹（左一）昨日與RubberBand為跑手表演打氣。
今年渣打馬拉松在添馬公園舉行「家庭跑」外，更舉行了賽後派對，大會請來RubberBand和創作歌手李拾壹表演，為各跑手打氣。原來李拾壹表演之餘，亦有參加渣馬半馬賽事。
李拾壹在半馬賽事後到添馬公園演出，在接受傳媒訪問時，指今次是他人生第一個半馬，雖然一度擔心未能完成，但在不停地跑之下，最終他報稱以2小時36分完成挑戰，之後還可以為跑手唱歌打氣，令他覺得相當開心。李拾壹說：「希望嚟緊可以參加三項鐵人，呢個係我最終目標。」
