邊個話胸大冇腦㗎！好似人稱「崔Big瓜」嘅崔碧珈，雖然入行打正旗號賣性感，但喺英國中央蘭開夏大學畢業，擁有市場學大學學位嘅佢，其實好有生意頭腦，舊年仲喺元朗開咗間快餐店，實行學以致用，從商為將來鋪路。
據附近商戶同街坊消息，間舖開咗半年多啲，生意都唔錯，除咗賣一般快餐店食物，仲賣埋pancake、甜品，不過舖租就一啲都唔平，平時除咗有幾個員工睇檔，崔媽媽大部份時間都會喺舖頭，崔碧珈就多數喺夜晚先至出現，不過一定會戴曬口罩遮到實，收工冇人先會除罩透透氣。
【包冚開工】
崔碧珈上年喺元朗開咗間快餐店，唔使開工佢就落舖幫手。
【廚房打點】
唔想俾人認出，崔碧珈喺舖入面全程都戴口罩。
【除罩唞氣】
崔碧珈落手落腳倒完垃圾，之後先除口罩傾咗一陣電話。
留守廚房幫手
日前記者按報料去到位於元朗鳳攸南街嘅「Tata」快餐店，果然見到頭戴白色cap帽，著黑色羽絨同戴口罩嘅崔碧珈喺店入面幫手，可能嗰晚天氣寒冷，加上已經晚上10點幾，所以人流唔多，但崔碧珈都全程留喺開放式廚房入面幫手，好少行出嚟樓面，到客人走曬佢先明顯放下戒心，行出嚟同員工傾嚇偈。
貴為老闆娘，崔碧珈一啲都唔錫身，收舖前仲見佢親自將一袋袋大垃圾，用手推車推去附近垃圾房，不過就有啲雞手鴨腳，短短兩分鐘路程就出現多次翻車，搞到垃圾袋跌曬落地，要逐袋執翻上車，十分狼狽。而崔碧珈嗰晚丟完垃圾就終於除咗口罩，仲企喺街邊傾咗一陣電話，等埋店員關閘先一齊走，果然好有義氣喎！
採訪、攝影：楊浩賢、吳耀輝
from:
http://hk.apple.nextmedia ... 160204/19477966
