選港姐是做明星捷徑，曾幾何時是好多成長中港女的夢想；不過今日如果你輸在起跑線，就注定做輸家。僅得中五學歷的「硬膠Ashley」何洛沂和「牛雜妹」Monnie李美琪儍儍分不清遊戲規則，Ashley入到最後40名仍是落空收場。她前日受訪大爆選美黑幕，認為現今參選不止重學歷，還要有後台方能成功！
今屆港姐大多學歷超班，且非富則貴。自認是平凡港女、現年23歲的「硬膠Ashley」何洛沂，早前語帶諷刺在facebook宣佈自己落選：「我並不比任何人差，沒後台沒華麗住址，剛踏上人生的起點。」
Ashley前日在海洋公園接受本報訪問，皮膚白滑的她無懼穿三點色式泳衣示人，自信滿滿的戴起小皇冠及手執權杖，她說：「升初中時見到電視啲女仔好靚，戴上后冠同權杖，自己都想試嚇呢種感覺。但大個咗我發覺唔係嗰回事，𠵱家電視台，要睇有冇人撐腰、有冇關係。開頭都諗住係傳聞嚟，直至自己參選面試後，更多報導出嚟，就覺得有關係。」是否要靠後台？她說：「有人係背後嘅話，好多嘢都好順，因為我係冇父蔭靠，又冇猛人撐腰。」
被指整容的Ashley提供兒時照片證明冇加工。
Ashley一償戴后冠的心願。
「住邊都好重要」
賽前大熱的10優狀元兼劍橋生麥明詩（Louisa），以及其舊同學、曾考入曼哈頓音樂學院的龐卓欣（Ada）。有傳Louisa的副校長爸爸與身家過億、與娛圈人稔熟的「十哥」林棣權相識，而Ada父親則是東驥資產管理董事總經理龐寶林。Ashley直言未「入閘」已被比下去：「我住居屋，幾年前屋企經濟環境非常惡劣，讀完中五就冇讀書，出嚟做嘢幫手供樓。所以我面對評判好理直氣壯，覺得自己起碼中學畢業，可能香港人普偏程度都係咁。但等緊嘅時候，發現嗰邊佳麗全部雙碩士，再唔係就海外歸來，反而我同一齊俾人話硬膠嘅Judy同聲同氣，知自己同佢哋學歷有差距，但係屋企有冇錢、你住邊原來都好重要。」
部份入圍佳麗樣貌被評唔夠靚，Ashley笑說：「入圍佳麗可能同我哋想像16強有啲出入，反而話唔選嗰啲，Mandy狀態非常之好。而我參選當然亦要有自信，覺得自己笑容好甜，同埋我真係冇整容！」她透露無線要求入圍40名的參賽者，要簽一份保密協議，條款多達數頁紙，但並未有列明毀約金額，Ashley說：「其實當時只有Celine（首名退選者）冇簽，可能佢有更好發展。而我就覺得都已經嚟到呢個地步，簽時冇得再考慮。」不過見完評判後，Ashley就自知無望：「40個女仔分5個10個咁入去，之後再抽樣叫咗廿幾個，全部都係大熱。既然覺得我唔得，但又唔畀我走，由朝早11點幾，留到我最後一批夜晚7點先走。」
「牛雜妹」Monnie因抑鬱放棄讀大學，她卻不屑被一張證書綁住。
牛雜妹不屑高學歷
同樣被out的「牛雜妹」Monnie亦是個顧家乖乖女，但在公開大學讀了一年便輟學，除因抑鬱情緒問題，亦不屑被一張證書綁住，她昨日在電話中說：「對我嚟講係一張紙，自己唔覺得學歷高係個人嘅所有因素，修養、內涵都好重要，學歷高又唔代表你聰明啲。」參選學歷高有著數？她說：「感覺上係輸蝕少少。」選港姐要有後台？她保守地說：「始終呢個圈識多啲人一定有著數，有人提點你衣著、言行舉止。即使後台好勁都要睇表現，唔信每個人睇都唔得嘅人會攞，我諗大台又唔會做到咁。」
採訪：嵐山
場地：海洋公園水都餅店（Ashley）、泰斗Thai Master（Monnie）
化妝﹕Cat Yeong of Gingko
服裝﹕UNNI of314
from:
http://hk.apple.nextmedia.com/entertainment/art/20150628/19200612
