曾經拍過張智霖《你是如此難以忘記》MV、外號娘娘嘅網絡紅人杜小喬，自從今個月3號之後都冇上facebook，直至噚日凌晨佢終於「現身」，原來佢靜咗一排係因為患咗紅斑狼瘡症。
包包面變月亮面
杜小喬噚日凌晨喺facebook上載咗港台劇《醫護人生》劇照，自爆話：「其實，我患上了紅斑狼瘡。」小喬話突然變成一個有人認識嘅「娘娘」，佢當然好感激大家喜愛，但亦因為自己信心不足同扮堅強而不知不覺間累積咗壓力。佢又話：「其實除了入院，還做了小手術。現在每隔一星期還要抽血，驗VV。食藥少不了，其中，可惡類固醇的副作用令我由包包面進化成月亮面。」小喬多謝屋企人同醫護人員照顧，亦多謝朋友關心，最後仲為自己打氣話：「我會好起來的，祝福我吧=)」唔少網民睇到之後都有留言同小喬打氣。噚日馮仁昭打過畀小喬經理人Leo，佢話小喬𠵱家休息緊，多謝大家關心。
小喬噚日喺fb自爆患咗紅斑狼瘡症。互聯網圖片
周海媚曾經被傳患紅斑狼瘡症。資料圖片
紅斑狼瘡症係自體免疫系統疾病，患者多數係女性，包括74年港姐冠軍張文瑛，而之前傳過嘅周海媚，就否認患紅斑狼瘡症，澄清自己只係血小板過低。
撰文：馮仁昭
馮仁昭
from:
http://hk.apple.nextmedia ... 141222/18976942
