「高登女神」杜小喬，四年前拍過網片《我在香港當兵的日子》、《男人有話兒》系列，做親都係專收「觀音兵」嘅「娘娘」角色，故有「娘娘」嘅美譽，仲引到班宅男暈陀陀，社交網閒閒地都有過三十萬嘅粉絲，成功躋身為網絡紅人。不過，早喺兩年前佢就因壓力太大，患上咗紅斑狼瘡症，試過一日要食十六粒藥。雖然o依家已經減到日服八粒藥，但呢個病始終係不治之症，人易攰之餘，又要避免曬親病發。
日前，東姑去灣仔喫車仔麵期間，就撞到「娘娘」幫ViuTV拍《瑪嘉烈與大衛系列—前度》外景，當日「娘娘」為免曬到出紅疹，就笠咗件長袖冷衫當防曬褸，準備都算充足；不過，唔知係咪攰得滯，加上又驚個病發作，即使「娘娘」拍個行行企企嘅鏡頭，都不停NG，東姑見到都戥佢班「兵」心痛吖！
日前，杜小喬拍攝ViuTV的《瑪嘉烈與大衛系列—前度》外景時，個鼻同兩頰一片紅，唔知以為係化妝失手，其實係個病搞到佢出紅斑。
拍咗兩take，「娘娘」已經攰到睡眼惺忪，不斷NG，認真慘慘豬。
鏡頭外，「娘娘」同其餘女演員雞啄唔斷，人緣都唔錯。
