龔嘉欣嘅舊愛鄧健泓，同Freeze成員石詠莉拍拖已經公開曬，仲有傳佢哋兩個已經去到談婚論嫁嘅地步，打算係下年結婚。但龔嘉欣不愁寂寞，因為佢都已經有著落，最近就有報導話佢同沈震軒拍拖，仲已經火速住埋一齊㖭！
最近有雜誌影到龔嘉欣收工直接去咗沈震軒住嘅茅湖仔村，之後仲素顏喺沈震軒屋企走出嚟去買外賣，第二日就輪到沈震軒去超級市場買日用品。兩人分工合作，似足新婚夫妻，不過佢哋其實都好小心，點都唔會一齊出門口，避免俾人見到。
龔嘉欣話𠵱家工作行先，唔會拍拖。資料圖片
上年淆底縮沙
報導仲話沈震軒其實一早都想追龔嘉欣，只係當時龔嘉欣身邊有個富二代，所以佢縮沙唔敢追，直到龔嘉欣同富二代分手佢先再出擊，上年亦俾人影到佢哋一齊行超級市場，但嗰時佢哋仲係瞭解階段，所以兩個人點都唔肯認，但因為各自對對方都有好感，所以一撻即著，仲好快住埋一齊，都係為咗爭取多啲時間見面。
本報昨日電話聯絡龔嘉欣，她說：「唔好意思呀！總之報導啲嘢唔係真，我𠵱家單身，好享受工作，暫時冇諗拍拖啲嘢！」
撰文：馮仁昭
from:
http://hk.apple.nextmedia.com/entertainment/art/20141119/18939605
