沈震軒抱着結他唱道：「男人不可跌下，可背起任何代價；男人不講廢話，不夠打亦能捱打。」——《打不死》
為什麼筆者一開波便要他即席表演？因為市面太多流流哋，作曲可能請槍，錄歌可能逐粒音執到靚；唯獨自彈自唱，童叟無欺。
沈震軒也賊笑：「否則人家以為我累積咁上下知名度又玩玩吓。」
既然「男人不講廢話」，點解仲要唱生晒？知者不言，言者不知——知道的人（或有智慧的人）不會說，說出來的人並非真知道。這是個困局，沈震軒曾選擇少說話了十年，至今仍被視為新人、沒捱過苦、只識溝女……
雖然時間可證明一切，但時間不等人。
別問我是誰
這行愈做愈明白，冇話冇咗邊個唔得。
為什麼引言形容他「賊笑」？只怪沈震軒出道演蒲友。「原來角色的第一power可以咁耐。我演過殺手添，難道現實裡殺人？好心態惟有enjoy入型入格。」
但公仔箱不容許個性，轉過頭參與綜藝節目又被指太cool不夠好玩，尤其未夠紅時。
「我抱着心態是Why not？電視台成日話要『入屋』，但演員不應該被什麼都知，會因此不想睇我做戲的。演員是替朝九晚五、乏味的人發夢，正如我不想知Christian Bale真人原來好搞笑，蝙蝠俠唔係咁喎。」
於是對一切緋聞也訴諸朦朧美。「如果真係都幾好。」
這叫「新保守主義」，明明彈出是因有觀眾偏愛沈震軒小壞蛋形象（所以至今蓄小鬍子），到頭來卻嫌疑似爛滾，甚至因此雪藏。
最好解釋是窮——港女不會黐的。「起初月薪六千，住尖沙咀劏房租金四千，每日不可以用超過五十蚊，否則欠租。放假是罪惡，等如減低演出機會，收入少了，去玩又要消費。」
請問我是誰
這種入型入格，其實不想永遠囉。
但又不用太擔心先入為主，正如筆者不擔心被定型只識寫人物專訪，反正冇乜人留意，Who are you？
沈震軒說：「拍到《使徒行者》（時間已是二○一四年），導演和我閒聊：『你本身做model、外借來的嗎？冇乜TVB感覺。』我答：『我就是訓練班出身囉。』非完全壞事，演員就是令人覺得特別，但同時我心諗，那位導演拍過我幾次了，應該見住我由扮死屍行出來。
「爸爸自細教我少說話多做事，但現在都要解釋吓，我卅四歲，偏向old school，算是最後一批跑足幾年龍套漸漸被認識的。」
朝中無人，路，大概便如此。想發圍，在大台跟大隊抑或我行我素好？此時，不如試唱歌，歌手沒配角，人在台上的幾分鐘至少是擔正，自負盈虧。
雖然更易total lost。沈震軒說：「這行愈做愈明白，冇話冇咗邊個唔得。」
我是我
沈震軒很老實，沒自詡音樂奇材。「十一歲去加拿大魁北克省讀書，那裡講法語，少中國人，連英文也少。我由一個睇《龍珠》、《聖鬥士星矢》的港孩去到陌生環境，華人學生通常靠讀書叻有得上台演講，我就靠唱歌找回滿足感，小型比賽，贏過九位對手咁大把。
「回港參加新秀，輸咗。入藝員訓練班填表，興趣一欄，個個填唱歌跳舞——有幾喜歡音樂、有幾音樂人呢？難得今次機會，我參與晒創作，自編自導MV，連字體也因學過design鍊到盡。」
沈震軒如此總結：「我用生命做音樂。」太誇張了吧？以時間、心血來計，其實算。推而廣之，我輩沒巨星般大批助手列陣，沒專人獻計玩弄財技而發上加發；寫稿寫歌寫字樓都是每粒字單打獨鬥。
敢說這才是用生命工作。
網上出現拖手片，沈震軒情事既神秘又亂如麻。
與才女雷琛瑜排排企，乾乾淨淨的沈震軒一樣唔失禮。別太強
拍照時，宣傳人員、攝影師和沈震軒自己，都在意別顯得手瓜太粗。
明明練出來，肩上還紋上圖案強調線條，到頭來縮？
哦，因為現階段唱滄桑歌不宜狂野，因為洗甩壞蛋形象，因為留待拍打戲作秘密武器……
半生不熟的藝人要小心計算。
有時機關算盡太聰明，例如吳兆棠改個雅緻些的藝名吳卓羲，反有位被嘲「唔唱K」；沈震軒原名沈浩明，結果花名「深圳軒」。
Always think too much，甚至遭雪藏（本可凸顯《打不死》），也說話留一線，和光同塵。
我們都是如此狹縫裡生存。
撰文：余家強
攝影：黃志明
攝錄：葉志明
豪語錄單打獨鬥沈震軒SAMMY
