現年27歲的李悅彤（Liddy），今年年中被本報拍得與李心潔的導演老公彭順在圓方咀嘴，孭上小三之名的Liddy再被爆父親為啟晴邨槍擊案吞槍自殺的疑兇。飽受失戀及喪父之痛的她避靜半年後，昨日再次投入工作，與母親手拖手拍攝有線電視節目，二人稍後起程到泰國取景。兩母女在中環一教堂接受本報獨家專訪，首次露面的Liddy媽咪坦言支持女兒決定，更講到眼濕濕，她表示沒有怪責彭順，因家中有個規矩「18歲以後要對自己負責。」
採訪：黃曉妍
Liddy背負彭順小三之名，媽咪怕她受壓力，曾苦勸離開娛樂圈。
資料圖片
【母女扶持 重新出發】
上星期四李悅彤剛度過27歲生日，昨日她穿上白色外套、牛仔褲與媽咪在中環一教堂內，為有線拍攝旅遊節目《帶阿媽去旅行》作為復出頭炮，兩母女稍後會跟隨製作隊伍到泰國進行外景拍攝，昨日二人接受本報獨家專訪。雖然編導揀選教堂取景，純粹是因為環境優雅，不過對於飽受流言歷練的兩母女來說，教堂對她們有著重新出發的意思。二人在節目中深情對話，盡訴母女情，心情輕鬆不少的Liddy拖住媽咪散步，合照時又輕輕搭住膊頭，在這段日子，家人的無限支持，令Liddy獲得重新振作站起來的力量。
對於前夫李德仁吞槍亡，Liddy媽咪總帶點傷感。
Liddy與媽媽當日灑淚送亡父最後一程。資料圖片
記：記者 媽：Liddy媽咪
記：你見到個女復出，會唔會好安心？
媽：梗係有！
記：支唔支持Liddy復出？
媽：支持！全力支持，工作行先吖嘛！
記：當初嗰件事（啜爆彭順）之後，怕唔怕Liddy再受到壓力，叫佢唔好做呢行？
媽：梗係有啦，但一切隨緣。
記：不過Liddy好想喺娛樂圈發展？
媽：佢自己有思想囉，我叫佢隨緣。
記：會唔會好心痛個女？
媽：梗係有，始終係自己個女。
記：有冇好嬲對方（彭順）？
媽：冇，咁又唔會，我哋信佛唔可以嬲人，呢啲都係一個成長嘅階段，我哋屋企嘅細蚊仔到18歲以後，就要對自己負責任，學識自己長大，𠵱家社會同以前唔同，管得太多反而會反叛，𠵱家細蚊仔好難搞，哈哈，咁樣可以令佢早啲長大。
記：前夫性格如何？
媽：（嚴肅起來，帶點傷感）嗰啲唔好提喇，尊重佢，人都走咗咯！
經一事長一智，Liddy表示已放下一切。
【Liddy悟透人生】
「好與唔好嘅事都會令到人成長。」Liddy在媽咪身上學會這人生道理，經歷父親離世，Liddy更加明白生命短暫，拍拖到失戀其實是一件小事，做到真正放下，就算與彭順，或是李心潔合作都不會介意。
記：記者 李：Liddy
記：幫有線拍節目，係你復出嘅第一個工作？
李：係，可以咁樣講。
記：𠵱家心情點呀？
李：都幾輕鬆，當去旅行，同媽咪去旅行。
記：好耐冇同媽咪去旅行？
李：都唔係，之前先去完泰國玩。
記：今日喺教堂取景，係咪寓意一個重新開始？
李：我諗都有，其實早早自己已經重新出發，覺得任何事都好，都應該放低，要放下，真正重新再出發。
唔抗拒拍彭順電影
記：同李心潔一樣都係放下，大家都放低咗？
李：（笑，望一望媽咪）大家有啲經歷之後，係會有啲得著，任何一啲好同唔好嘅經歷，都會令到一個人成長。
記：你之前講過唔介意同李心潔有合作機會？
李：我經歷咗好多嘢，好多事我都睇得好化、好淡，好多嘢都隨緣。
記：唔抗拒同李心潔合作？
李：你真正做到放下，其實任何嘢都唔係一回事，人生在世係好短暫、好脆弱，應該要珍惜身邊所擁有嘅嘢。
記：咁彭順呢（合作）？
李：（大笑）關佢乜事呀？哈哈哈！
記：如果有人搵你拍電影，係彭順執導，你會唔會接拍？
李：總之任何機會，自己鍾意角色，我唔會理週遭一啲外在嘅原因，總之係我鍾意嘅角色，鍾意呢行，呢啲工作我會全力去做。
記：睇得咁開？
李：媽咪好大功勞，因為媽咪信佛，所以呢段時間不停向我灌輸好多正確人生嘅道理，點樣睇一件事，人在世好短暫，你將任何嘢放到咁大做乜啫？其實係好小嘅一件事，係塵埃，唔需要耿耿於懷喺心入面。
「將愛畀曬媽咪」
記：你同舊愛Simon復合？
李：唔係，其實真係好朋友嚟，始終我同佢拍拖7年，好多時大家都唔需要講嘢，會好清楚呢個人係點，所以喺我最失落嘅時候，有佢肯扶我一把，好感謝呢啲好朋友喺身邊，呢個恩情，我會一世記住，會報答。
記：Simon會唔會想同你復合？
李：工作方面我都隨緣，何況係感情呢？感情嘅嘢更加估唔到，反而係open、隨緣，我唔會執著。
記：你𠵱家係單身？
李：單身。
記：有冇人追？
李：（大笑）我諗我𠵱家見到男人會驚。
記：有陰影？
李：唔係，做朋友先，好多嘢都唔使咁急，我27歲啫，流流長。
記：呢件事之後，有乜嘢想同媽咪講？
李：媽咪係我人生入面最重要嘅人，會錫佢，將爹哋媽咪一鋪過將啲愛畀曬佢，媽咪對我嚟講好緊要，所以媽咪你要身體健康。
from:
http://hk.apple.nextmedia.com/entertainment/art/20141111/18930449
