在樂壇浮沉了10年的鄧穎芝（Vangie），4年才出一隻碟，她自嘲勁低產，為了興趣不惜自資出碟，將大拿拿60萬元擲落鹹水海，還慘被網友嘲笑是樂壇曱甴、死極都死唔去，堅持夢想的Vangie自覺愧對父母，打不死的她惟有當自己是榴槤：「有啲人會爭住食，有啲人會走唔切。」
撰文：余燕儀
現年29歲的鄧穎芝入行10年，最近一張碟是大半年前推出，再之前一張是07年，她自嘲說：「好似4年出一隻碟，勁低產，去到𠵱家冇乜所謂，你問我想唔想紅？個個都想，但冇得勉強，我係好鍾意唱歌嘅女仔，雖然未必唱得好好，繼續有歌咪唱囉，啲人問點解隔咁耐先出一隻碟？好多人懷疑我點維生，其實我一直有做嘢，成日返大陸接騷，𠵱家冇經理人，好多嘢靠自己。」
鄧穎芝直言在香港樂壇發展不容易。資料圖片
自資60萬出碟
已沒唱片合約的她，為了堅持唱歌的夢想，決定再自資出碟：「上隻碟都係自資，揼咗60萬落海，好肉赤，會諗係咪應該繼續呢？我覺得等於儲咗一筆錢，有啲人鍾意買手袋，只不過我係買音樂。其實我一直有賺錢，我將啲錢攞曬去旅行，想做音樂就做，有少少打游擊心態，今次都係繼續自己做，好聽嘅歌就錄咗派台，我覺得咁樣舒服啲，壓力冇咁大，反正我都係鍾意唱歌啫，唔係要趕年尾攞獎，隨心囉。」
Vangie沒奢望可大紅大紫，但有時閒言閒語卻令她氣餒：「乜嘢曱甴、死極都死唔去，點解要咁難聽？將我拉埋落邊個（樂壇曱甴阮民安）度，我真係用心去做音樂，雖然你未必鍾意聽我唱歌，我又未唱到天后級，我只係想堅持夢想，點解要咁樣話我？但唔理得咁多，我當自己係榴槤，有啲人會爭住食，有啲人會走唔切，做呢行就要學識EQ高啲，總有鍾意聽我唱歌嘅人，我唔會因為你嘅說話，停止我鍾意做嘅嘢，唔好聽嘅說話我已經習慣。」
下年30歲的鄧穎芝，自覺事業未有成就，要令父母擔心，非常慚愧。
「香港搵唔到錢」
家人是否支持她唱下去呢？Vangie感慨說：「下年30歲啦，好彩有個好好屋企唔使我養家，但自己都慚愧，好似做咗10年乜嘢成就都冇，有少少對父母唔住，所以更加想堅持做到啲成績，等佢哋唔使擔心。」10年都沒想過放棄？她說：「每個人都有自己價值，呢個都係我唔放棄原因，雖然我出歌好少，但都有人搵我做嘢，證明你仲有價值，香港係搵唔到錢，慶幸內地客戶錫我。」
舊愛林師傑早前偷食斷正，令鄧穎芝再被關注。資料圖片
舊愛林師傑偷食好帶挈
G.E.M.（鄧紫棋）憑參加湖南衛視《我是歌手2》在內地爆紅，鄧穎芝早前亦返內地參加《中國星之夢》，賽前不停學唱歌又去外國進修，順利打入第一輪後，竟忽然被叮出局，Vangie大呻：「好唔公平，入咗第一輪好開心，但之後俾人『暗殺』咗，佢哋話因為入咗20幾人太多，所以foul咗10幾個。」
入行多年的Vangie事業未見突出，反而向舊愛「木偶哥」林師傑捉姦傳聞更為人熟悉，Vangie無奈說：「其實我緋聞唔多，只係得嗰個，冇辦法啦，𠵱家佢咁出名，啲人關注佢唔係關注我。𠵱家感情生活空白一遍，年紀唔細唔想拍散拖，再搵男友要圈外人，呢行太多誘惑。」
from:
http://hk.apple.nextmedia.com/entertainment/art/20141108/18927314
