鄧穎芝（Vangie）被喻為「樂壇小強」，加入娛樂圈逾十年，最近終於被無線無情的法規打沉了。據一名幕後人員透露，Vangie最近幫ViuTV拍《G-1格鬥會》有出色表現，被無線監製王偉仁看中，邀請拍攝由馬國明、蔡思貝等主演的《心理追兇Mind Hunter》，劇集前日試造型，但未見Vangie現身，原來她已被無線飛起。
據聞Vangie原本飾演一名跳舞出眾的女仔，並會做何遠東的妹妹，甚至已跟導演傾好劇本，但臨門一腳被抽起。有指無線高層下達命令，要封殺曾為ViuTV拍節目的藝人，而Vangie曾為ViuTV打MMA比賽，形象太過ViuTV，所以要易角。
「希望下次把握到」
Vangie昨日在電話中起初支吾以對謂：「係……呀……哈哈……呀呀……之前係有接觸過，有初步接觸啫，初步接觸啫。」是否演跳舞好叻女仔？她說：「嘩，咁深入嘅，個角色我就唔知啦，大概囉，搵一個人拍劇都係搵佢嘅character。」
自由身的Vangie被問可覺得自己成為電視角力的犧牲品？她說：「做藝人好被動，有機會嚟搵你一定要好好把握，今次自己可能把握唔到呢個機會，希望下次把握到啦。我都有喺TVB客串過劇㗎，十年前拍過《四葉草》，都係跳舞嘅。」會否不敢再幫ViuTV拍節目？她說：「嚇，我都要做嘢㗎！總之有機會我都會把握，始終自己冇management，乜都想做嚇。之前參與過兩個舞台劇，又同彭秀慧上堂，對演戲好有興趣。」是否樂壇式微要轉型？她說：「又唔好咁講，藝人要多方面發展。」樂壇小強精神不滅？她說：「堅持自己夢想，我覺得OK嘅！」
採訪：嵐山
鄧穎芝有跳舞底子，原本有望在劇中顯身手。互聯網圖片
（右起）馬國明、蔡思貝有份拍攝的無線劇《心理追兇Mind Hunter》前日試造型。
from:
http://hk.apple.nextmedia ... 160605/19641689
