唐紫睿（Hazel）前晚在ViuTV女子格鬥真人騷《G-1格鬥會》，與鄧穎芝（Van仔）對壘，兩人私下老友鬼鬼，前晚相約一班朋友到酒吧睇比賽。因為她們同樣兩戰全勝，實力不相伯仲，所以這場對戰可謂相當激烈，鏡頭前她們一點都不錫身，拳拳到肉兼扭作一團打地戰，Hazel更一度向Van仔施以腳鎖，但最後Van仔使用蠻力瓦解，直到最後一回合，Hazel雖然凌空使出arm bar，鎖到Van仔幾乎投降，不過Van仔死頂捱到完場，結果最後裁判判Van仔以點數98比91勝出。比賽期間，見到Hazel在混戰中bra top移位，險些飛釘走光。
事後Hazel說：「差少少露點，好彩Van仔察覺到即鬆手，其實嗰晚我冇黐乳貼，如果咁樣唔覺意露點就真係唔抵，好大犧牲啦。」她亦透露當晚媽媽亦有到場觀戰，Hazel說：「佢驚到胃抽筋，痛咗幾個鐘，我仲記得佢上台時第一件事就話我打乜嘢比賽，我一路喊，佢一路幫我抹眼淚，好似細個咁，其實好感動。」
「試過一次就夠」
不過正所謂友誼第一，比賽第二，Hazel坦言與Van仔的友情已經昇華，她說：「噚晚同Van仔睇得好開心，我打完呢場之後整親條腰，因為Van仔太大力，但我好多謝Van仔，如果唔係佢，我唔會show off到呢幾個月練得咁辛苦學番嚟嘅嘢！」
Van仔亦有在fb留言：「謝謝你！因為你，我的努力也沒有白費。」她表示賽後在籠內休克了數秒：「一邊耳仔聽唔到嘢、條腰好痛，人一世物一世，呢啲經驗真係試過一次就夠喇！」
撰文：唐琛悠
【走位】
Hazel在混戰中bra top移位，險些飛釘走光。
【瓦解】
Hazel（右）最後一擊的腳鎖，被Van仔的蠻力瓦解了。
Hazel（右）和Van仔前晚相約齊齊睇比賽。
from:
http://hk.apple.nextmedia.com/entertainment/art/20160510/19604675
