馬德鐘夫婦、陳爽、富婆Laura同鄺美雲前晚喺赤鱲角出席慈善晚宴，下月生得嘅陳爽挺住巨肚現身，話希望自然分娩生B仔，仲已經執好走佬袋，見佢手腳仲係纖瘦，佢話：「重咗6、7公斤，BB重6磅幾，想自然生，唔好太大。」
倪晨曦（左）整傷腳，包紮兼撐枴杖現身。
羅霖（中）作性感懷舊打扮，支持馬德鐘太太張筱蘭（左）做搞手嘅慈善晚宴。
一身LV及Hermès富貴造型嘅Laura，話單身都唔怕寂寞。
馬德鐘：囝囝年少無知
陳爽覺得個肚越來越大就越辛苦，話勤力啲游水令個肚舒服啲，問佢有冇練定氣生仔？佢話：「4個月嗰時學瑜伽有練過，會推淋巴調節，老公叫唔好去街去咁遠，隨時衝去醫院，我叫佢準備相機，佢入產房，我心會定啲。」
馬德鐘囝囝馬在驤日前獲黎明頒獎，事後媽媽張筱蘭喺微博爆囝囝唔識黎明，馬德鐘解釋囝囝多睇西片，視野國際化，本地娛樂最多睇自己劇集，係咪睇唔起本地藝人？佢話：「唔係，睇唔起咪即係睇唔起我，佢年少無知，大明星都唔知，返去打籮柚。」老婆話兩公婆係黎明粉絲，可以播唱片收藏畀囝囝聽。
富婆Laura就話最近冇馬賽消息而心情好轉，問會唔會同舊愛汪子琦復合？佢話：「冇嘢冇可能，冇想像，隨緣。」係咪對人有戒心？佢承認仲乘機寸馬賽：「傷到好似劇本先有咁，但都係當人係好人先，呢啲人少有，好難先遇到。」鄺美雲下月去內地探訪，上月就到懲教署向青少年分享，佢話：「同班女仔講排毒都排唔切，仲吸毒？一講靚，女仔都想。」
撰文：馮仁昭
From:
http://hk.apple.nextmedia ... 140925/18878049
