陳爽早排同老公梁梓軒及囝囝去咗峇里島出席朋友婚宴。微博圖片
陳爽早排同老公梁梓軒帶埋5個月大囝囝Adrain去咗峇里島出席朋友婚宴，前日佢哋一家坐飛機返港。
噚日有位香港航空嘅職員同本報爆料，投訴陳爽喺飛機上做咗一啲好討厭嘅行為，例如中途打開頭頂行李櫃門唔閂、服侍佢沖咗3次奶又要沖水洗奶樽、用餐時間換尿片，又將用完嘅尿片放落餐車垃圾袋，職員要求佢將片放入廁所垃圾桶，反而俾人鬧足成分鐘、到航機準備降落嗰時又唔肯熄手提電話等。
陳爽自言全程只係負責餵奶同𠱁BB瞓覺。
認帶B出埠壓力大
作為香港航空營業及市場部銷售經理嘅陳爽為息事寧人，佢噚日透過電話短訊回覆話：「其實噚日搭飛機有好多屋企人同行，大家都有份照顧BB，開奶次數就冇所講咁多，但將一樽奶開到正確溫度都要重複溝冷熱水，至於尿片處理不善，我真係唔清楚，因為全程我只係負責餵奶同𠱁BB瞓覺，作為一個新手媽媽，第一次同BB出埠壓力非常之大，顧及嘅嘢非常多，要處理嘅事不能盡錄，今次我哋可以平安返到嚟都要感激所有幫過我哋嘅人。」
撰文：馮仁昭
馮仁昭
from:
http://hk.apple.nextmedia ... 150330/19094457
