黎耀祥與蘇玉華拍檔演無綫新劇《載得有情人》，這個組合屈指一算原來已相隔十四年。二人言談間發現這個事實，不禁驚訝時日飛逝。各自在藝壇耕耘，再度合作，阿蘇笑言沒有演技上的比併，反而是更多的體驗與交流，感受到祥仔演技的質樸。而祥仔亦指今次與阿蘇一拍即合，與這位拍檔合作毫不費力。
黎耀祥與蘇玉華再度拍檔毫不費力。
祥：黎耀祥
蘇：蘇玉華
阿蘇不經不覺已在演藝圈打滾十多年。
阿蘇現實中有感情要好的男友潘燦良。
通識取經
祥仔演活不少草根角色，帶領觀眾投入故事當中，為他贏得不少掌聲。原來一切源自祥仔每天都做的功課，生活就是他的課題。
祥仔隨遇而安，與妻兒相聚已滿足。
祥仔不諱言演戲只是打份工，搵餐飯食。
祥仔在新劇演阿蘇的司機。
阿蘇與祥仔十多年前已合作。
祥仔演過不少草根角色，今次做小巴司機。
阿蘇演過多齣舞台劇，亦有與影帝黃秋生交手。
阿蘇劇裏與黃子雄演情侶。
祥：我鍾意生活實在嘅感覺，就連平時飲茶食飯都會留意啲侍應，坐車就會留意司機，今次就揸小巴。
蘇：仲做埋我私人司機添！
祥：其實揸小巴都好得意，今次要揸車、要面對生活，又遇到個咁麻煩嘅女人，會點呢？我哋都畀戲劇規範咗、電影化咗，如果演一個侍應就要好有禮貌，其實佢係咪好有禮貌呢？
蘇：我自己演戲時，好多時都會嘗試實現自己嘅諗法。
祥：我會去觀察佢哋，發掘背後嘅想法，相信係大家認為我演草根角色好睇嘅原因。
注入靈魂
阿蘇笑言每個角色都有蘇玉華的存在，亦因此助她投入角色。對於演戲，阿蘇仍希望繼續精進，對自己每次的表現都充滿期待。
蘇：個角色嘅背景係我冇嘅嘢，大富大貴嘅屋企，做CEO嘅能幹爸爸，浸鹹水、高學歷，仲有一個好好嘅男朋友。
祥：你投訴緊你男朋友？
蘇：我都有一個好好嘅男朋友！佢係一個冷靜、質樸嘅人，崇尚自然嗰種女仔，呢部分係似我，但佢唔願意面對自己嘅生活，就唔似我嘞。
祥：演咗出嚟一樣就慘啦！
蘇：我希望變成一個可以多樣化啲嘅人，而自己同角色之間嗰條橋樑，係我演戲時要搵嘅嘢。
祥：每個角色始終係發掘緊啲唔係屬於你嘅嘢，亦因為咁出咗去個安全位置，但好多演員都停咗喺度，變成只有「本色」嘅演員。
演戲搵食
阿蘇在演藝圈十多年，從合作夥伴的身上獲益良多，更希望能一一訪問欣賞的藝人，承傳寶貴的經驗。問阿蘇會如何訪問祥仔？祥仔立即自問自答。
祥：梗係問：「做乜鬼嘢演戲！」
蘇：咁你演戲最大得着係乜？
祥：搵到兩餐。我係冇大志嘅人，搵到食就得喇。
蘇：應該唔止呢啲。
祥：一言難盡，最大得着係補充自己嘅人生空白，每個人天生有啲嘢冇咗，大家都會搵嘢去填補，每個人都唔同，而我係靠演戲去填滿。
蘇：細個都冇夢想要做乜？
祥：冇o架，我係冇夢想嘅人。
蘇：作文堂要交功課喎，我就會作大啲！
活在當下
二人談夢想、談興趣、談演戲，祥仔不諱言演戲只是打份工。面對生活變化仍能不受拘束，祥仔追求的，是隨遇而安的生活。
祥：好似要小朋友喺標籤為「好」嘅職業中選夢想。
蘇：大個睇番，我都唔係要做呢啲，我會想去派吓牛奶都好喎，咁小朋友咪有奶飲囉。我仲有諗過不如做賽車手，因為我好鍾意揸車o架。我鍾意收信，亦都有諗過做郵差，係一件好浪漫嘅事。
祥：但朝朝返工都四圍走，仲要日曬雨淋，仲會唔會有浪漫感覺？
蘇：可能未必會有，但係現實生活當中見到有人係樂在其中，尊重自己嘅工作同埋搵到樂趣，我都好享受現在嘅生活。
祥：而我覺得仲搵緊，係咪樂在其中？我覺得OK，我冇乜好具體嘅興趣，唔似你鍾意去學好多嘢，可以令自己好忙。我覺得自己冇話有一條行開嘅路，或者「習慣」。同屋企人食吓飯，睇吓電視，睇吓《載得有情人》，我覺得係隨遇而安。
蘇：之前有位做開電視嘅朋友早排去試舞台劇，佢好肯定咁同我講：「我終於知道我唔係鍾意舞台，而係享受拍攝。」係我最近嘅一個有趣發現。
祥：我都唔肯定自己鍾意舞台，以前都做過《雷雨》，但試完後冇咩感覺。但我自問係享受演戲、享受經過嘅。
後記：滔滔不絕
訪問前一天，祥仔為新劇《梟雄》開工至深夜五時而略顯疲憊，但可以感受到他對演戲如何全力以赴；而阿蘇則神采飛揚現身。對生活抱有與演戲相同的熱誠，二人有講有笑，言談間不時停頓思考，並不是未有做好準備，而是他們對表演以及生活，實在是有太多的感受與經驗希望與你分享。
蘇玉華
髮型：Renton Hung via il colpo
化妝：Winki Tsang
服裝：Loom Loop PMQ,HAK PMQ
配飾：Coney and Co.PMQ
場地：千禧新世界香港酒店La Table
筆錄：影視組
攝影：李柏儒
From:
http://orientaldaily.on.c ... /00282_055.html
