黎耀祥、蓋鳴暉噚日喺大帽山幫無綫拍《水髮胭脂》節目巡禮，呢個好明顯係搞笑劇，因為劇中祥仔要力追都係做粵劇老倌嘅蓋鳴暉，但慣咗反串做小生嘅蓋鳴暉唔識應付愛情呢味嘢，見到祥仔都怕怕，從中發生唔少笑料，噚日拍攝時，佢兩個仲有作狀親吻戲㖭，都算重口味！
撻足五次
拍攝時為咗營造喜劇效果，祥仔一於chok到盡，蓋鳴暉就半推半就，既表現出冧樣，但見祥仔要咀過嚟時，又扮驚逃走，仲講佢嚇到碌落山，所以蓋鳴暉就要拍撻落榻榻米嘅戲拍咗五次咁多。
祥仔話拍巡禮得幾分鐘交代劇情，所以要誇張啲，笑言自己啲表情好似色狼咁：「不過場親熱戲係唔會真錫。」祥仔同蓋鳴暉對上一次合作係三年幾前嘅《畢打自己人》，祥仔希望呢個劇拍得成，因為佢好耐冇拍喜劇，亦都想探討啲老倌嘅內心世界。
祥仔輕托蓋鳴暉香腮，作狀咀落去，齋睇相已經好有喜劇效果！
祥仔承認為咗幾分鐘內表達劇情，所以同蓋鳴暉嘅形體動作都要誇張啲。
蓋鳴暉連撻五次落榻榻米，表現認真又落力。
能夠再同祥仔合作嘅蓋鳴暉就話好開心，個戲係做番自己，不過見佢拍攝時走位有啲陌生，佢話：「好耐冇拍劇，好在有祥仔幫，若果拍都係明年嘅事，應該可以適應。」
蓋鳴暉又讚祥仔比以前穩重：「佢拍《西遊記》時好鍾意玩，𠵱家穩重咗，人仲係咁好，成功人士成名就係冇乜分別。」
版主：陳基征
from:
http://hk.apple.nextmedia ... 131008/18454003
