喺上月生咗囡囡「小蕊蕊」嘅台灣女星吳佩慈，喺佢懷孕期間，成日傳佢同香港融匯資本有限公司CEO兼澳門永利酒店股東、坐擁百億新台幣身家嘅男友紀曉波結婚冇望，一來因為男友𠵱家嘅社會地位不缺女人，二來吳佩慈生嘅係B女，冇辦法綁住男友。
噚日喺中環街頭發現向吳佩慈男友紀曉波嘅追數街招。
簡體大字報
吳佩慈生B到𠵱家都未有結婚消息傳出，噚日有讀者報料，話喺中環街頭出現印有吳佩慈同紀曉波相片嘅「追數令」街招，街招印住兩張大頭相，兼用簡體字寫住「欠債還錢」，但冇留低任何資料，事後馮仁昭去咗中環，但搵唔到呢張街招，話晒紀曉波有過億身家，成件事都好耐人尋味，噚日搵紀曉波了解，佢透過孫姓發言人回應：「這是非常無聊的事情，我們已經報警處理。」坐緊月嘅吳佩慈就未有回應。
其實之前曾傳紀曉波喺吳佩慈生B前夕，撇低佢同一個女星坐私人飛機去澳洲度假，搞到農曆新年佢要單拖留港度過！吳佩慈事後否認仲喺微博晒幸福，又有傳佢會喺辦理小蕊蕊出生登記時，一併辦結婚登記正式成為紀太！
陳茵媺遭下令禁笑
陳茵媺在熱播劇集《叛逃》中的角色內斂，監製早已下令禁止她笑得太燦爛，陳茵媺不諱言緊張非常，於一場情緒崩潰戲份中，未能hold住低落情緒12小時，惟有整日埋位以外，拒絕與人交談！
因角色需要，陳茵媺遭監製禁止笑得過分燦爛。
性格樂天的陳茵媺於劇集《叛逃》來個大挑戰，演繹一名內斂又Cool的Madam，監製一開始已下令，禁止她笑得過分燦爛，眼神亦不能太陽光，令陳茵媺大感有難度，拍檔吳卓羲於對稿時又經常爆肚，令全場笑翻天。
談到拍攝難忘事，陳茵媺透露一場講述其情緒崩潰大喊戲份，拍攝時間長達12小時，她謂：「我從來冇試過一直拍到第10、11個鐘，最重要嗰part，個感覺突然冇晒！本身要用真感覺演戲，所以搵唔到個feel就開始緊張，後來當日我食午餐都暱角落頭，任何人同我傾偈都係一兩句，好在最後都做得到，亦因為嗰次令我學到好多嘢。」
陳茵媺透露囝囝成日笑，黐爹哋又黐媽咪，唔會偏心。
陳茵媺在《叛逃》的角色既內斂又冷酷。
訓練囝囝有思想
對於囝囝Aiden出世至今3個多月，陳茵媺一臉甜絲絲透露與陳豪每次聽到有喊聲，也會鬥快跑到Aiden身邊，就連半夜餵奶，陳豪也會陪伴在側。問到是否開始為Aiden張羅學校？她直認：「開始諗，聽講香港好誇張，要research學校，我喺外國出世會嚮往自由，都想個仔訓練自己思想，功課係重要，但佢點應付每件事，對人生每一日係從咩角度去睇，要有想法比較重要。」
她坦言現已教Aiden發英文字母單音：「一開始講嘢已經好開心，就算係講叉燒都好開心，個仔成日都笑，瞓瞓下都會笑。（送囝囝去外國讀書？）睇佢自己想唔想，起碼都要大學之後嘅事。」
