無綫新劇《神鎗狙擊》上個禮拜四（九月五日）齊腳响觀塘做宣傳，緊接《衝上雲霄Ⅱ》播出，男主角之一嘅張兆輝就話對收視好有信心，事關劇中好多飛車場面，演員全部親身上陣，相信收30點應該冇問題。
輝哥落力谷劇，但同樣係男主角之一嘅謝天華，活動當日就自爆《神》劇係佢無綫告別作，唔會同公司續經理人約。問佢有咩去向？原本謝天華話留番2014年先公布，但最後唔講又講：「我會自己開間『拉風工作室』（Laughing Workshop），日後內地同海外老闆可以直接聯絡我傾工作，亦都好歡迎各界好友入股投資，我而家都搵緊經理人，幫我打點日後嘅工作。」
谷劇變Laughing宣傳易，謝天華仲話想徐子珊過檔，做佢旗下藝人。近年無綫花旦小生走剩冇幾多個，謝天華仲要公開搶人，大膽！
將會離巢自組經理人公司嘅謝天華，開到聲想簽徐子珊，公開同無綫搶人。
輝哥以飛車鏡頭親身上陣做新劇賣點，計我話，岑麗香著小背心扮女飛虎，先係最「大」賣點。
（《Face》圖片）
對住現場班後生女，周海媚刻意搽到塊面鬼咁白見人，同輝哥膚色唔夾事小，最緊要可以一白遮三醜。
岑麗香話晒係新進女神，又係無綫四大處女，活動當日特別多男士搵香香合照。
