林峯同周麗淇（Niki）近月喺橫店為now拍《大漢賢后衛子夫》，日前終於拍埋煞科戲，劇組燒炮仗慶祝。林峯同Niki喺內地拍咗3個幾月，𠵱家終於可以返香港，唔怪得林峯同Niki都表現得好開心。煞科戲當日連now嘅副總裁何麗全都有到場，仲幫Niki攞風扇，搞到佢受寵若驚。現場仲為監製梅小青同劉家豪慶祝結婚周年紀念，Niki就乘機向林峯催婚，搞到佢手都震埋。
林峯同周麗淇喺大熱天時着咁厚嘅古裝拍劇，有苦自己知。
狂飲正氣水
大熱天時拍古裝，可以想像幾辛苦，Niki透露拍呢套劇時中暑兩次：「真係暈㗎，之後佢哋搵人幫我刮沙，同畀正氣水我飲，入行以嚟都算最辛苦。」
另外，Niki喺拍劇中度過農曆生日，好彩新曆生日可以返香港同老友過。講到拍檔林峯同女友吳千語新聞多多，估唔到累埋Niki，佢話：「佢哋好煩，個個嚟問我，所有嘢我都唔知，唔好問我。」至於主角林峯終於可返香港，最開心係咪千語BB？佢答：「離開呢度先算！」有報道話千語BB要林峯買樓畀佢，林峯就話已出聲明唔回應。
中暑兩次嘅周麗淇得何麗全為佢攞風扇，難怪佢受寵若驚。
身為監製嘅梅小青（右）同劉家豪（左），親力親為幫周麗淇整好啲戲服。
而監製梅小青同劉家豪就大讚內地拍劇配套比無綫完善，場地、服裝等方面都優勝，仲寸佢哋冇無綫飛紙仔嘅情況出現，梅小青話：「我哋劇本出齊先拍，租兩個廠景加埋都四萬呎。」劉家豪又話靈活性比無綫更大，因無綫要清楚落單先可以開工。
劇組放炮仗慶祝煞科，林峯等人即刻㩒住耳仔費事嚇親。
眾人即場切蛋糕慶祝劉家豪同梅小青嘅結婚周年紀念。
from:
http://hk.apple.nextmedia ... 130827/18395924
