林子祥（阿Lam）最近為無綫劇《衝上雲霄II》唱主題曲《衝上雲霄》，首歌被網友、劇迷插爆鬧老套，好似返咗80年代，仲拎佢首歌同陳奕迅（Eason）為《衝》劇唱嘅《歲月如歌》比。前晚阿Lam帶病現身九龍塘綵排音樂會，佢起初唔多願講，仲搵工作人員出嚟擋駕話：「唔准問有關《衝》問題。」
阿Lam話自己冇上網，所以唔知網民對首歌有乜反應。
綵排一粒鐘後，記者再同阿Lam做訪問，再三追問下，阿Lam無奈答咗幾句，佢話：「我同鄭Sir（填詞人鄭國江）一樣唔想講，我冇上網，連email、SMS都冇，唔知咁多事。」講到外間熱捧《歲月如歌》，阿Lam反問：「即係Eason嗰首？」隨即為自己首歌平反，佢話：「有人鍾意呢首，有人鍾意嗰首，我又唔係搶番嚟，係TVB安排搵我創作。」
《衝II》連周潤發都話有追，但阿Lam就話冇睇過。劇照
冇睇過《衝II》
問阿Lam介唔介意被網民批評？佢話：「睇都冇睇，點解要介意？唔會理咁多嘢。」佢仲話冇睇過《衝II》，但讚Eason首《歲》係一首好歌，阿Lam越講越㷫話：「有好歌你鍾意就聽，唔好歌唔鍾意咪唔好聽，冇得比較，始終係10年前嘅事，劇情又唔同，兩件事都唔一樣，你哋覺得係唔係？」
from:
http://hk.apple.nextmedia ... 130808/18368381
