無綫03年劇集《衝上雲霄》好受歡迎，由陳奕迅唱嘅主題曲《歲月如歌》亦同套劇一樣被觀眾奉為經典。十年後，續集《衝上雲霄II》將緊接《好心作怪》、喺今個月15號播映，大家都以為《歲月如歌》都會係呢套劇嘅主題曲，不過原來《衝II》搵咗林子祥（Lam）唱新嘅主題曲，粉絲聽完都好失望。
大家唔係彈阿Lam唱功唔得，而係首歌同套劇完全唔啱feel，覺得編曲老套，似足80年代嘅流行曲。有網民抵死話：「陳奕迅首歌係聽完有理想有前路有光明，聽完林子祥首歌好似見夕照，冇光明，了無生氣咁……」
噚日聯絡上《衝II》監製陳維冠，原來換新主題曲係有隱衷，佢喺電話度話：「我哋都知大家好鍾意《歲月如歌》，但TVB劇係要賣埠，歌曲嘅外地版權比較複雜，如果用《歲》只可以喺香港播，最後決定用新歌。阿Lam仲好好，專登為《衝II》度身訂做新歌。」對於俾人話好80年代，陳維冠話：「《歲》愛情感覺重啲，阿Lam呢首歌就好勵志，越聽越有味道。」
《衝II》主題曲由林子祥（左）頂替陳奕迅唱，但被評似八十年代歌曲。陳法拉最近經常周圍飛，去到馬來西亞宣傳《衝II》仍大受歡迎。
Sam哥吳鎮宇平時cool爆，估唔到佢玩呼拉圈咁叻。靚仔張智霖跳騎馬舞都型過人。
《衝上雲霄II》將於本月中喺香港同大馬同步播映，日前一班演員喺大馬造勢。
陳法拉大馬出巡
《衝II》會喺馬來西亞同步播放，吳鎮宇、陳法拉、張智霖、吳卓羲等一班演員日前去咗吉隆坡同怡保宣傳，cool爆嘅Sam哥吳鎮宇同觀眾一齊跳騎馬舞同轉呼拉圈。
離開咗無綫嘅法拉亦好受歡迎，出入好似女王駕到一樣，佢話：「有啲粉絲專登由新加坡嚟支持我，佢哋好有心，我都想同佢哋玩個痛快，仲可以食特產榴槤。」
from:
http://hk.apple.nextmedia.com/entertainment/art/20130701/18317879
