相隔近十年再埋班合作嘅杜琪峯、劉德華、鄭秀文，近期頻頻撲撲，為新作《盲探》做宣傳。星期六（十五日）晚冇蒲頭上海電影節嘅Sammi，第二日一落機就趕去做記者會，跟住再不停做傳媒訪問，差不多成七點先收工。
夠鐘食晚飯！劉華搭機趕返香港同妻女過父親節，阿杜約咗朋友食全蟹宴，Sammi就同經理人郭啟華等，一班人去咗盧灣體育場嘅得和茶館食水煮魚水煮牛，三個拍檔，各顧各。
劉華上星期六出席完上海電影節開幕，第二日同Sammi、阿杜、韋家輝、游乃海做埋《盲探》記者會，就劈去機場返香港慶祝父親節。
其實Sammi同隔籬版嘅郭富城一樣，都係火鍋粉絲，兩個亦同樣係運動狂，日日跑，打火鍋熱毒，未驚過！
Sammi（箭嘴）同經理人、髮型師去食辣嘢，十點半返酒店，仲有棚fans等緊佢。
