鄭秀文（Sammi）昨日以代言人身份在銅鑼灣出席adidas旗艦店開幕，一直很努力操弗的她大談身形問題：「希望有番線條，著貼身裙都想pat pat肉隆起嚟。身材係天生，我上圍係比較細，首先要接受天生畀你嘅身形，再睇嚇點操到一個最好睇嘅狀態，作為女性唔應該太介意自己嘅三圍數字，我想增肥幾磅，係有難度，盡力，食嘢健康啲，少食多餐。」問到老公許志安有否陪食？Sammi說：「佢鍾意我肥啲，最近仲講出心聲，男仔睇女仔同女仔睇自己係唔一樣，有啲肉感覺健康啲係好好睇，嘗試教育我。」笑問安仔是否覺得「好攬啲」？她笑說：「唔好講呢啲，純粹以健康、男士角度睇，我覺得有道理。」
曾與黎明（Leon）合演電影《愛您愛到殺死您》的Sammi，前晚與蘇永康等人捧場睇Leon演唱會，完騷後她到後台探班兼在社交網站留言：「好睇！快歌我們全部觀眾都按捺不住企起身跳舞，好high！男女歌迷都叫到飛起，哈哈！充滿集體回憶同埋令人感動嘅演唱會。」
Sammi所到之處，經常吸引大班fans現身支持，場面熱鬧。
森美獲邀為活動擔任司儀，在台上與Sammi談笑風生。
Sammi（左二）前晚去睇黎明個唱，大讚有氣氛。DV圖片
心郁戶外開騷
接著Sammi又貼出《愛》片的電影海報，慨嘆已是18年前的事，她昨日繼續大讚Leon騷氣氛好：「4唔4D唔重要，今次佢嘅處事態度令所有人好欣賞，噚晚啲歌都好熟，台下好high，黐咗咁，我明白啲人睇我啲騷都咁high，歌夠hit同夠氣氛係好好玩，好似好多共同回憶返番嚟。」問到Sammi會否希望在戶外開騷？她笑說：「都幾好，但我好大汗，女仔跳完舞換衫、換絲襪就麻煩啲。我覺得呢個場地幾得意，亦啟發到除咗紅館，你諗得到好多嘢就做得到。」提到噪音方面，Sammi說：「我又唔覺，一到快歌我嫌唔夠㖭！最緊要係藝人本身，我冇特別留意特效。」問她會否希望開4D演唱會？Sammi搞笑地說：「搞咗身形先。」
採訪：黃曉妍
攝影：沈健程
from:
http://hk.apple.nextmedia ... 160503/19595200
