失落今屆金像獎最佳女主角的鄭秀文，剛完成杜琪峯新作《盲探》。杜導為愛將度身訂造女警阿彤一角，要癲要喪仲要打到飛起，俾晒位Sammi發揮；難得合作無間的劉華，唔介意變「傍友」做陪襯，拍攝期間還做埋私人武術指導，親自落場，試走位、驗威吔。
兩「猛男」出盡力幫拖，無非都是幫Sammi在來年金像獎爭取入場券，果然夠朋友！
信晒導演有多套千萬票房紀錄電影的鄭秀文，先後六次獲金像獎提名最佳女主角，包括今年憑着《高海拔之戀II》再獲提名，不過最終敗在有齊天時、地利的《春嬌與志明》楊千嬅手上，失望之情，頒獎禮上表露無遺。
對於愛將未能在電影成績表上突破，電影題材大部分以男性作主導的杜琪峯，將希望放在新片《盲探》中，度身設計角色給Sammi外，亦特別將整部戲的軸心和戲分集中她身上，要癲、要喪、仲要打，比起劉華有更多發揮。
「拍杜Sir嘅戲一向無劇本，每次都係去到現場，佢叫我點演我就照做，大家合作咗咁耐，嗰份默契信心講唔到俾你聽，只可以話我信，信到放晒手，完全無多心懷疑，照做！出到嚟嘅效果，出乎意料的好！」Sammi說。
哮喘兼戒煙多時，杜Sir一聲令下，Sammi硬掘扯煙上陣。
飛紙仔開工，片場內，杜Sir不時Sammi上身，向對方示範演繹方法。
角色度身訂造有發揮，連打燈都全面配合，令一向A4身材的Sammi，罕有現深坑。
劉華傍實拍慣文戲的Sammi，在《盲探》片中頂替劉華打鬥連場。已經七度同Sammi合作的劉華，明知對方動作經驗唔夠，於是私人傳授秘技。
「今次有好多打鬥場面，好多時一場戲有好多招式要記，自己無呢方面概念，華仔就教我用跳舞嘅方法去記招式，好work！」
據知Sammi每次拍打戲，劉華即使無開工通告，都一定在場，親自為拍檔試位，盯到實！
其中有場Sammi由二樓經電燈柱滑落地面，劉華不單只親自示範一次，到Sammi親自埋位，劉華亦寸步不離，又為她檢查威吔，確定安全，才通知杜導roll機，照顧周到。為咗Sammi，連動作指導、威吔組都撈埋的劉華，夠晒義氣！
做開運動，筋骨柔軟，戲中做劉華好友的郭濤一手抽起Sammi小腿，杜Sir一take收貨。
查案查出感情的Sammi同劉華最終大團圓收場。
Sammi吊威吔由二樓電燈柱頂滑下，事前劉華親自為拍檔試位兼驗查，照顧有加。
在電影中有三十個造型的Sammi，出動私伙衫令扮相更維妙維肖。
楊千嬅憑《春嬌與志明》捧走今屆影后，令六度獲提名的Sammi大失所望。
《盲》片在康城舉行全球首映，連一向唔多願行紅地氈的Sammi都俾面配合出席。
