今年有《西遊．降魔篇》、《百星酒店》及《2013我愛HK》三部華語片賀歲。三片為谷票房，奇招盡出。論搞笑度，《我》片是地道式笑料，最啱香港人睇，其中一幕謝天華被炸何B仔，由欣宜為他撲火的戲，笑破肚皮。《西遊》亦冇悶場，難得黃渤加舒淇的爛撻撻演繹，好搶戲。至於《百》則中規中矩，無甚驚喜。
至於宣傳戰，星爺先贏一仗。他勝在識玩緋聞，搞完舒淇又搞娜姐（周秀娜）。《我》片則大卡士大堆頭，集合曾志偉、葉玉卿等大星雲集首映，周三（6日）還殺到星馬宣傳。《百星酒店》由於火熱人物吳千語未能出席香港宣傳，較蝕章。
《2013我愛HK》必睇位
謝天華被魯芬追債，佢無錢還，魯芬將炮仗點着放入他褲襠內。原來，為求逼真，呢場戲用真炮仗，雖然有內膽護陰，但因為NG咗幾次，搞到天華條Boxer都燒燶咗，肚臍亦被燒傷。真係替天華嫂抹一把冷汗！
飾演沙展的黃光亮，係欣宜老竇，本來喺後巷洗頭恤髮，聽到炮仗聲以為槍聲，衝出去就撞見愛女欣宜為天華「吹」熄褲襠啲火。
睇足三套賀歲片，《2013我愛HK》最有親切感，雖然條橋舊，勝在演員夠生鬼。欣宜完全肥姐上身，演得夠放，含住雲吞溝仔一幕，真係拍爛手掌。黃宗澤同徐子珊亦好放，略嫌卿卿戲少，唔夠喉。戲中對白幾抵死生鬼，反而阿倫同志偉交代場口穿插片段頗悶場。
至於《西遊．降魔篇》，以往孫悟空都係衝動派，今次黃渤版本最初猛擦佛祖鞋，後來至揭露兇殘陰濕一面，表現同舒淇一樣咁搶眼。文章飾演唐三藏，都係戇直青年冇驚喜，反而小豬（羅志祥）飾演空虛公子，成日被佢班「美女」寸佢係腎虛公子，就勁好笑。
講真，之前兩年對黃百鳴賀歲片有啲失望，今次叫有番啲驚喜。雖然個故事唔新鮮，又係女主角為分家產扮結婚，但叫做拍得流暢。吳君如與毛舜筠交足貨，熊黛林講粗口幾好笑。三套嚟講《2013我愛HK》最大眾化。
戲院鬧鬼
WIN
欣宜、黃宗澤及謝天華睇戲，天華買飛時以為得佢哋入場，入場後卻發現全院坐滿化濃妝嘅公公婆婆。原來係老人院班老人家做完大戲，未落妝趕住去睇戲啫。
英語諧音
徐子珊逼黃宗澤同個仔學英文，黃宗澤惟有用中文拼音死記，即My Son寫成「賣身」，Kiss便寫成「打茄輪」。Spoon就變成「屎盆」。被問到「一諾千金」時，黃宗澤大叫：「鵰！」咪心邪，佢係講緊英文「Deal」呀！
卿卿扭腰
三子之母的葉玉卿，46歲仲keep住24吋纖腰，35C豐滿上圍，點會唔喺戲中露一手，仲要唱〈擋不住的風情〉，騷味十足！
《西遊．降魔篇》必睇位
唔肯咀豬
舒淇將豬個元神封咗喺個嘴度，要文章用個口吸個元神出嚟封印。文章始終下唔到決心，放生咗豬八戒。
馬騮教舞
為咗捉拿豬八戒，飾演悟空嘅黃渤，就教舒淇用美人計色誘八戒。呢個悟空蒼老得嚟好蠱惑，卒之舒淇亦死喺佢手上。
《百星酒店》必睇位
城嫂爆粗
熊黛林今次飾演外表斯文、內裏衰人嘅女明星。鏡頭前拍關懷老人廣告，轉頭就虐待邵音音同冬叔，仲要爆粗，幾破格。
君如聞臭腳
詹瑞文飾演污糟有錢佬，女工吳君如要幫佢腳底按摩。詹瑞文對腳又甩皮又灰甲，真係難為咗君如！
宣傳星爺最掂
論宣傳攻勢，星爺套《西遊》就最搶，早在上映前兩星期，星爺已主動同舒淇搞緋聞，近日又食住周秀娜分手，再傳星爺都想追佢。一條橋用足兩次，但慘得過有人炒作。周日（3日），《西遊》率先在北京搞首映，明攻內地市場。文章同黃渤都係大陸當紅小生，《西遊》話咁快成為全國最矚目新片。
至於《我》片，有無綫作後盾，電視廣告先勝一仗，本周一（4日）北角新光戲院搞首映，亦星光熠熠，除了志偉、卿卿外，另外兩位男女主角徐子珊及黃宗澤仲玩造型現身，實行大堆頭取勝。
黃百鳴的《百星》上周六（2日）首映都晒冷，不過就欠缺近日被熱炒嘅林峯女友千語BB，聲勢稍弱。
走勻中港台
WIN
周日（3日），《西遊》喺北京首映，黃渤、舒淇、星爺、周秀娜都有到，就連客串嘅羅志祥都嚟撐場。《西遊》早前去過台灣及香港宣傳，本周二（5日）再到廣州宣傳，周三至輪到香港。
香港冧女
上月初，星爺已經積極為《西遊》在香港宣傳，他在記招上，先是同當紅主持黎芷珊扮晒熟，之後又認舒淇係自己女朋友，擺明為新片做勢。
首映當日搞造型比賽，鮮橙徐子珊同七彩嘅黃宗澤，分別贏咗男女最佳衣着，欣宜個懷舊look都輸個馬鼻。
除了本地薑，卿卿更特別由美國返港，同好耐冇拍戲嘅校長一齊宣傳。
晒馬40人
首映當日，無綫call齊四十幾個藝人撐場，大堆頭取勝。
獨欠BB
黃百鳴的賀歲片向來sell卡士，今次《百星酒店》都係。上周六（2日）首映晒冷，不過就冇咗女主角千語BB。
撰文：娛樂組
攝影：攝影組
