「最美麗港姐」朱玲玲前晚和老公羅康瑞到灣仔會展，捧好友林子祥演唱會場。出過不少相集的朱玲玲，在台下變身客席攝影師，拎住長鏡不停狂影，幫老友留影。
朱玲玲捧阿Lam場拎住專業級長鏡狂影，老公羅康瑞（左）就習以為常
林子祥（阿Lam）和趙增熹前晚在灣仔會展舉行演唱會，阿Lam太座葉蒨文在控制台主持大局，完騷後她也匿在記者會偷望，不搶老公風頭。阿Lam好友朱玲玲和夫婿羅康瑞低調捧場，穿皮褸、長褲的她看得非常投入，和老公不時交頭接耳，又指指台上。
阿Lam意猶未盡
向來愛攝影的朱玲玲，拿着專業級的「長炮」對準台上，狂影阿Lam，幫老友留低舞台身影，朱玲玲不時舉鏡，老公羅康瑞就習以為常繼續聽歌。
阿Lam有一環節和女舞蹈員拖拖手，他笑言：「呢個係我唯一可以掂嘅女仔，因為佢係我朋友。」阿Lam和兒子林德信合唱《追憶》，林德信拎住紙巾上台說：「我唔係嚟唱歌，係幫你整頭、補妝，Sally（指葉蒨文）叫我拎定紙巾，話你唱舊歌成日喊喎。」阿Lam被篤爆，即時有點害羞尷尬，林德信即為爸爸印汗。完騷後，阿Lam大呼意猶未盡：「唔夠喉呀，希望再搵場地再唱，再喺會展搞嘅話最快8月先有期。」
From:
http://hk.apple.nextmedia ... 130204/18155734
