林子祥（阿Lam）和趙增熹前晚在會展舉行演唱會，捧場有陳潔靈、張智霖和袁詠儀、陳奕迅、李玟和老公Bruce等，之前傳感情有變的潘源良和李麗珍結伴而至，用行動粉碎謠言。首位出場的嘉賓是盧凱彤（Ellen），她以結他為阿Lam伴奏，阿Lam即錫她的臉一啖。
【今日我至傷】林子祥（右）開騷，最感人就係佢同乖仔林德信合唱《追憶》嗰陣，阿Lam可能想起自己爸爸，一時傷感眼濕濕
畀師奶狂咀
接着阿Lam乖仔林德信（Alex）上台，兩父子唱出《追憶》，阿Lam感動眼濕濕：「你好lucky可以同爹哋合唱，我就冇得同你爺爺一齊唱。」Alex聞言謂：「我知你唱親都喊，所以攞定紙巾畀你。」席間播出已離世的張國榮（哥哥）、黃霑、林振強、陳百強、鄧麗君、羅文、梅艷芳及黃家駒等片段，阿Lam又唱出哥哥的《陪你倒數》及阿梅的《抱緊眼前人》。阿Lam落台時，師奶fans紛紛衝上前，其中一個更攬着他錫了幾啖，嚇到他甩嘴。
此外，松岡李那前晚在銅鑼灣出席團年飯局，日前她被影到夜訪Alex屋企更髮尾濕着離開，她否認和Alex拍拖：「仲有其他人一齊，我冇沖涼洗頭，佢都冇追我。」
From:
http://hk.apple.nextmedia ... 130203/18154754
