失落視帝的33歲林峯，有傳拒跟無綫傾新約，玩嘢推劇，仲傳退出娛樂圈，返廈門打理家族生意。
原來，林峯已經有晒部署，據知待今年初約滿之後，林峯將會把經理人合約一併簽給英皇，除了狂拍內地劇搵真銀，楊受成更承諾2年開3套電影谷行chok峯。做唔成視帝，唔通林峯想做影帝？
聞死敵冇癮
林峯強調同無綫仲有約，但就唔肯講仲有幾耐，一聽到樂易玲改捧馬國明，林峯冇癮話：「幾十套劇唔係幾個人拍晒。」但說到英皇則笑晒口話好幫手。
唔認林峯
12月尾，樂易玲帶親生仔撐汪明荃，記者提到林峯是其契仔，樂易玲否認，記者再說林峯是其「親生仔」先真，但她竟斷言話林峯唔係「親生仔」，然後笑說自己親生兒子在旁，和林峯關係大不如前。
力捧chok峯
林峯和英皇合作5年，關係密切，而且林峯國內又有知名度，賺錢之餘，亦幫到旗下唔少歌手，據聞今次楊受成出盡辦法力捧chok峯。
無綫搞視帝視后全民投票，林峯坐定粒六結果大熱倒灶，連馬國明都O嘴，林公子又點會唔洩氣？一早宣布完成本月的紅館演唱會，便會暫別舞台的林峯，原本一心幫無綫拍新劇《食為奴》，但冇獎冇情講，峯少突然扭計話唔想剃頭，又話剃頭影響工作喎！
賽前最高呼聲嘅林峯，頒獎禮當晚俾馬國明、黎耀祥（上圖）夾擊，難怪成晚都扁晒嘴，亦令他加重離開無綫的決心。
Paco（左）再次搵愛將葉念琛（右）執導，原本想搵林峯擔正，但無綫唔肯放人
繼承父業~對於引退傳聞，林峯說︰「爹哋（林華國）年紀都大，我身為長子，屋企有需要時候，都要負呢個責任。」但堅稱未有確實時間。
無綫推戲決裂
無論獎項和演唱會，明顯英皇比無綫更重視林峯，難怪峯少有「離心」。
知情人士說︰「其實家吓林峯仲使咩拍TVB劇吖？不過咁多年都拎唔到視帝，佢做到好灰。以為憑《雷霆掃毒》最有機會，點知都係食詐糊，唔嬲就假！跟林峯有歌星合約的英皇趁機硬撬，叫佢連經理人合約都過檔，講明幫佢開電影、又接大陸劇。加上林峯歌星合約，呢幾次演唱會又搞得咁好，對英皇好有信心。」
07年簽英皇唱片約的林峯，本月底將舉行第4次個人演唱會，威過唔少全職歌手。據知，如果順利做視帝的林峯會乖乖同無綫續新約，即拍攝黃偉聲監製的新劇《食為奴》，同前度緋聞女友鍾嘉欣合演，但上週林峯接受雜誌訪問，激爆推劇和打算返廈門打理家族生意，引退消息愈傳愈誇。
據知，近年唔少導演搵林峯拍戲，但無綫歷代小生，拍戲紅咗之後，就會離巢發展。除了邵氏電影，林峯近年只簽了黃百鳴3套戲，好少機會闖出無綫，最近Paco（黄柏高）亦想搵林峯擔正葉念琛的電影，但都被無綫以「冇期」推掉，林峯知悉後曾大怒埋怨，埋下反枱伏線。
樂易玲：唔係親生仔
前週，樂易玲一家三口捧汪明荃演唱會場，樂大媽對林峯態度180度轉變，她說︰「攞唔到（視帝）係會失落，唔想打擾他。」她又笑言林峯不是親生仔，自己親生仔在場內。
而週日（12月30日）林峯出席活動，對本刊否認引退傳聞，但問到跟無綫的合約和轉投英皇，林峯說︰「仲有啲時間（合約期），總之英皇對我好好。」據知林峯與無綫完約之後，將與英皇加簽2年經理人合約。為表誠意，英皇將全力谷本月中（13日）的《勁歌》頒獎禮，而且古巨基已表明不會出席，最受歡迎男歌手，峯少好淡定。
掘人仔好過
以為全民普選，可以憑fans打死蟻嘅chok峯，終於輸畀《大太監》嘅黎耀祥，林峯對無綫完全死心，堅持離巢。加上英皇全面打造chok峯成影、視天王，接大陸劇又拍電影，名利雙收，過檔搵大錢。
開始拍內地劇的林峯，去年與葉璇拍攝《紫釵奇緣》，兩人曾經傳緋聞，未播出已有noise
希望進軍影壇的林峯，去年只有時間拍了一套《男人如衣服》。
小生埋位
去年林峯拎唔到視帝，真係唔知等到幾時，3位小生陳豪、冧莊視帝黎耀祥和馬國明至少已有一套大劇在手，就連《衝上雲霄II》男主角都係外援張智霖和吳鎮宇，難怪林峯冇癮。
《On Call 36小時》最高收視達到39點，監製已決定今年開拍續集，憑此劇奪「我最喜愛的電視男角色」和大馬視帝的馬國明，隨時成為13年視帝。
3度成為視帝的黎耀祥，今年將開拍《巾幗梟雄3》，雖然拍檔換咗胡杏兒，但觀眾始終buy演技派，全民投票，黎耀祥亦有可能4度封帝。
京劇~自07年封帝之後，陳豪每年都打入5強，今年的《金枝慾孽（貳）》必定成為熱話，飾演戲班老倌的陳豪，更會唱京劇玩難度。
