上年張兆輝擔正嘅《結•分@謊情式》，成為處境劇收視之冠，無綫驚輝哥俾王維基撬走，今年除咗加薪近一倍，俾6萬蚊一集請佢拍劇外，最有誠意就係搵咗海味（周海媚）同佢做一對，開套《神槍追擊2013》俾兩人擔正第一男、女主角。
套劇上周四（6日）開鏡，海味身在內地趕唔切返港，介紹套劇嘅重任就交咗俾拍檔輝哥，而做阿二嘅謝天華，竟然趁做緊儀式時，攞部iPhone 5出嚟，同身邊嘅輝哥、徐子珊同陳煒自拍。吖，咁識搶鏡，「Laughing哥」果然係慣咗行「古惑」喎！
45歲嘅謝天華，未埋位前，已經chok住自拍，到人人企定做儀式，佢又突然拎部機出嚟，話要影合照。有無咁急呀？
