室內禁煙實施咗幾年，煙民都習慣咗出街圍住垃圾桶「打邊爐」。
不過總有煙民唔守規矩。早幾日媽咪姐喺TVB電視城巡廠，原本冷氣充沛嘅走廊，竟然又熱又有煙味。原來Laughing哥（謝天華）頂住道門食煙睇劇本，啲煙隨風「攻」番入嚟走廊，搞到經過走廊嘅人都被迫食二手煙。媽咪姐知道呢排酷熱天氣，街外熱到爆，涼住冷氣食煙的確爽好多，不過都要顧及人哋感受喎Laughing哥。
助導四圍摷Laughing哥，不過佢依然慢慢嘆完支煙先施施然入化妝間，夠晒自我。
有份拍攝《女警愛作戰》嘅Laughing哥，近日密密拍劇。早排先喺旺角同楊怡拍攝《法網狙擊》一幕求婚戲。
