【《蘋果》獨家專訪】昨日是陳豪40歲生日，新歡陳茵媺受寵，舊愛廖碧兒就一定飛out。廖碧兒去年12月被指搭上富二代林忠豪而狠撇陳豪，自此被封拜金女，負面新聞不絕，日前廖碧兒接受本報記者獨家專訪，揚言陳豪六年來都不肯給她女友名份，又暗示去年9月跟陳豪撻着的陳茵媺才是第三者，寸爆由失戀到有新戀情的陳豪變面神速，由慘樣突變開心男。說謊的伴侶，在她眼中才負面。撰文：夏琴
廖碧兒和陳豪的地下情一直是圈中公開的秘密，08年廖碧兒闖影壇、拍西片，一度盛傳與陳豪感情告終；去年初有指佘詩曼拍無綫劇《公主嫁到》時媾陳豪，至6月陳、廖復合，年底則有指廖碧兒飛陳豪搭上富家子林忠豪，於是變拜金女、形象差、被TVB投閒置散，負面新聞成籮。
怨陳豪拍拖多年唔肯認
是非擾攘至今半年，日前廖碧兒接受本報記者專訪大談感情事，她不吐不快說：「一嚟報道話我一腳踏兩船，我自己都呆咗。我同Moses（陳豪）都冇講過係男女朋友關係，一個女仔出嚟話佢係我男朋友，但你問個男仔佢唔認，我咪好瘀？如果有人喺公開活動拖我手，話呢個係我女朋友，我相信每個女仔都會好開心，但今時今日都冇，點知佢早排做訪問時講『過咗去就過咗去』，我都好confuse。其實由《心花放》到《妙手仁心III》，觀眾好接受我哋情侶檔，所以去到家嘅新聞，我覺得好可惜。」
陳豪一句「過咗去」，等同承認與廖碧兒有過一段關係，她說：「係囉，無啦啦，但關係可以係情侶檔或者同事朋友。」訪問中她多番揚言從來沒人認她是女朋友，她為何不問陳豪原因？她說：「每個人對認唔認都有自己嘅睇法同原因，你要問番人哋先得。」
廖碧兒被插一腳踏兩船，但陳豪沒幫口，她說：「冇話唔幫，但冇講過說話囉！」然後陳豪被飛很慘，廖碧兒是罪人，她寸陳豪：「可憐之後、俾人影咗（指陳豪與陳茵媺）之後突然開心番吖嘛，啲報道咁講。」
「第三者令感情冇得救」
其實，陳豪是否多大話？廖碧兒猶豫片刻才說：「我好難答。」陳茵媺是否第三者？她忽然語塞，支吾以對：「我唔知，我知佢哋上年合作過。」陳豪上月底被拍到在陳茵媺家過夜，實情兩人去年9月合作新劇《心戰》撻着，隨時比廖碧兒結識林忠豪更早。問廖碧兒對雙陳戀有何看法？她說：「唔知，我冇睇，之前傳阿佘同Moses我都冇回應啦，都係嗰句，係就恭喜佢，唔係就做嘢勤力啲囉。」
之前廖碧兒拍拖有沒有出現第三、四、五者？她愕然說：「唔答得呢個問題，總之我冇。」那陳豪有沒有？她即套用陳豪金句：「總之過咗去就過咗。」大多數人都無法容忍感情出現背叛、第三者或謊言，廖碧兒不例外，她說：「對感情係要好誠實，開心唔開心、不滿或滿足都希望同對方share，但講大話係minus（負面）。」對於近年小三成風，廖碧兒則說：「聽到有第三者嘅元素，都會有啲唔開心，會令感情冇得救囉。」
可是被狠批的是廖碧兒，指她當陳豪老襯、釣金龜，更難聽都有，她承認不開心，但既然無法控制，不如放開胸懷，她說：「最緊要自己知事實係點，世界係圓嘅，點樣對人一定會倒返轉頭，我會做好自己本份，其他嘅留畀上天安排啦。離離合合咁多年，人哋都有全新（女友）啦，我冇意見，我只可以話新一年新開始，無論身體上、私人上同工作上都從頭嚟過。」
「同陳茵媺唔係好朋友」
昨日有周刊刊登陳豪和陳茵媺訪問，陳豪自爆早於09年的台慶上已對陳茵媺留好印象，還着傳媒給予兩人發展空間，廖碧兒昨於電話中聞悉後淡然說：「哦，係咩？報道未睇，佢都講咗09年留意緊其他女仔，有好感，我冇得回應佢嘅感情問題，人哋嘅事點鋪排唔關我事。」對陳茵媺有何感覺？她說：「係同事，唔係好熟，冇乜點合作，唔係好朋友。」
http://hk.apple.nextmedia ... ;av_id=15174785
