林敏驄年初開始替亞視主持節目《智醒智勁四方城》，不少女嘉賓詐型被抽水，連周秀娜也被阿驄箍實纖腰。伴住阿驄主持節目的亞視新人譚杏藍（小花）早前在微博呻被阿驄欺負，有指她當時衝出影廠喊，阿驄昨對此無明火起向亞視要求換拍檔。
小花指曾被阿驄用手機高炒影胸，她2月時在微博說：「我以前唔出聲，因為我凡事以和為貴，又怕事！但今次EQ幾高，我都忍你唔到！我都有阿媽生o架！」有指另一女主持陳綺雯都是受害者，有指阿驄趁她坐低影髀罅。據悉為杜絕事件發生，亞視有意叮走阿驄。
阿驄昨在電話鬧爆說：「完全冇呢件事，係咪有人想博宣傳，借我上位搵錯人喇，搵林峯啦。我放得上微博啲相完全冇問題，唔好屈我，我都可以話畀阿媽聽。」他又說：「我啲朋友同王征好熟，亞視叮走我冇所謂，我唔恨做，反正佢哋畀晒錢我。」阿驄又彈小花和陳綺雯表現差：「我9號會再錄影，亞視一係換我，一係換佢哋，我唔想節目有啲搞事嘅人喺度。」
from:
http://hk.apple.nextmedia ... art_id=15144549
