張晉獲雙提名感開心，並已預料會被分薄票源。
攝影：郭賢興
【第35屆香港電影金像獎男配角篇】張晉在《一代宗師》中出色演繹馬三，讓他在前年成功贏得一座金像獎小金人，今年他分別憑《殺破狼II》中的獄長及《葉問3》中的詠春宗師，於下週日舉行的第35屆香港電影金像獎中再度角逐最佳男配角，與林敏驄、白只和張繼聰爭獎。
張晉在《殺破狼II》中演的獄長有不少打鬥場面。劇照
「票源一定分薄」
張晉早前受訪時笑言，今次再度獲得提名，心情跟上次差不多：「當知道有第一個提名時，嗰一刻反應係開心，到知道有埋第二個提名時，就變咗超開心。其實冇壓力，亦都唔擔心有兩個提名會分薄票源，因為一定會。」他又指未想到謝辭講稿：「上次都係諗少少，今次覺得未到時間，所以都未諗會多謝邊位。而太太蔡少芬如無意外都會陪我一齊去金像獎頒獎禮。」他又覺得無論憑哪部戲得獎對自己分別不大。獲落實在多部新戲中擔正任男主角的他，坦言未想到將來爭影帝：「嚟緊係會擔正男主角演幾部戲，提名男主角目前仲係太遠，總之用心做好每部戲，係每個演員嘅本份，其他都係錦上添花。」
林敏驄對提名感意外，他希望獲合演的拍檔到場支持。
攝影：葉君海
林敏驄在《全力扣殺》中瘋瘋癲癲，惹人發笑。劇照
獨獲提名遺憾
林敏驄在《全力扣殺》中以「別人笑我太瘋癲」的抵死搞笑演繹手法，演活戲中的羽毛球教練，成為男配角獎的攔路虎，神化的阿驄難得正經慨嘆電影不能入圍，要在頒獎禮當晚孤軍作戰。阿驄日前受訪時，坦言對於今次入圍候選男配角感到開心，他說：「冇諗過有得提名，雖然唔知道甄選流程係點，不過我相信一定係公平嘅，入到圍都係實至名歸。」
阿驄對於《全力扣殺》只有他入圍感到遺憾，他說：「成部戲得我一個入圍係唯一遺憾，以為可以入到電影獎，因為之前喺瑞士都攞咗一個亞洲最佳電影，所以今次叫佢哋一齊嚟，個個都耍手擰頭，好似得我孤軍作戰咁，不過我相信佢哋會嚟嘅。」
採訪：何永寧、小米
服裝提供：Gucci（張晉）
【最佳男配角提名名單】
林敏驄《全力扣殺》
張晉《殺破狼II》
張晉《葉問3》
張繼聰《陀地驅魔人》
白只《踏血尋梅》
from:
http://hk.apple.nextmedia ... 160329/19547851
