林若寧（中）對廣東話被打壓很反感，直指：「冇一種語言應該被消失。」資料圖片
【點起廣東歌】如果你鍾意聽廣東歌，最近應該被填詞人林若寧為吳業坤填詞的《原來她不夠愛我》洗腦；如果你只愛經典歌，一定聽過林敏驄為梅艷芳寫的《夢伴》，雖然被內地列為禁歌，但流傳至今。兩首歌相隔了30年，但好詞就可以撐起廣東歌，兩代填詞人眼看廣東歌步向夕陽，林敏驄說：「我會好hurt！」林若寧矢言：「冇一種語言應該被消失！」
【林若寧：港人要盲目支持】
林若寧，填詞人林夕徒弟，亦是叱咤903創作總監，近年的人氣作除了《原來她不夠愛我》，還有黃貫中的《年少無知》和連詩雅的《到此為止》等。為了撐廣東歌，今年林海峰（Jan）在「叱咤樂壇頒獎禮」上演繹的《I Want You廣東歌》，就是雙林的傑作。林若寧在商台接受本報專訪時說：「主要係Jan嘅idea，寫嗰陣一人jam一句，叱咤代表大部份廣東樂壇，冇得唔撐。喺大家做得比較攰同灰心嘅時候，係咪要為僅餘嘅目標打氣？」
林若寧跟林海峰合寫《I Want You廣東歌》力撐香港樂壇。
坤哥（中）成名作《原來她不夠愛我》，就是出自林若寧的手筆。
支持《羅生門》
林若寧對廣東話被打壓很反感：「我寫嘅詞、返嘅工都以廣東話為主，冇理由會支持人哋打爛飯碗，每個地方都應該有佢嘅母語，冇一種語言應該被消失！」會否擔心廣東歌沒落？他說：「我唔覺得廣東歌比以前差，可能大家歸咎於以前啲歌好hit，但大家鍾意嘅嘢唔同，唔代表嗰樣嘢唔好或質素差咗。」
提到捍衞廣東歌，林若寧說：「填詞人好被動，可以決定啲嘢唔多，想廣東歌市場繼續生存，在乎首歌係咪好，香港人要盲目支持。」《原》雖是去年「叱咤我最喜愛的歌曲」，卻非林若寧的最愛：「我係隔籬飯香，我會投《羅生門》，大家寫咗咁多年情歌，黃偉文依然搵到新角度，又有咁大共鳴，係成功嘅。」
雞同蛋關係
任職電台創作總監，是否有助廣東歌生存？他說：「係雞同雞蛋嘅關係，每個港人都可以令廣東歌好啲，鬧都好，知你緊張佢，但𠵱家係唔緊張。希望唔係因為廣東歌而支持，而係因為廣東歌好聽去支持。電台可以推動，但件貨都要做得好，否則點播都唔會好。」
撰文：余燕儀
林敏驄認為廣東歌是一個文化，不可能失去。攝影：林德雄
【林敏驄：呵護保育廣東話】
林敏驄在八、九十年代曾創作不少經典流行曲的詞，譚詠麟的《幻影》、張國榮的《少女心事》、梅艷芳的《夢伴》等hit歌都出自他手筆，對於香港樂壇被指不斷萎縮、廣東歌質素不復當年，作為填詞人的阿驄接受本報訪問談廣東歌時認為市場起了變化：「以前一張碟賣20幾萬隻，𠵱家一張賣20幾隻，世界唔同咗！」
「由心寫出嚟」
阿驄難得正經地說：「廣東話係一個文化，冇咗會好可惜，所以一定要撐！自己創作咁多歌，你叫我用英文寫都得，但廣東話係母語，寫歌係由心寫，你叫莎士比亞用越南文寫篇文都得㗎，但我諗會差少少囉！」
阿驄憶述廣東歌的風光年代：「喺七、八十年代好威水、好地道，當時國內都未興流行音樂，個個都爭住唱，廣東話本身係一種方言，唔可以被取代亦唔可能消失，好似台灣都有閩南歌，但都唔會取代到國語歌一樣。」
阿驄筆下有不少經典歌，梅艷芳的《夢伴》便是其中之一。
黃霑、盧國沾及鄭國江都是阿驄十分尊敬的填詞人。
世界不同了
出世便講廣東話的阿驄認為廣東歌自有特色：「寫、聽、唱都係廣東話已經有共鳴啦！呢個就係存在價值，亦係特色。其實廣東話係好美麗嘅文化，而文化係要呵護同保育，自己有幸為呢個文化貢獻過，仲有霑叔（黃霑）、鄭國江同𠵱家啲填詞人，所以有一日如果唔見咗廣東歌會好hurt，否定咗我嘅存在！」
問他減產多年，會否多寫廣東歌出分力？阿驄謂：「我個心同腦都一直冇停過，只係市場好似冇咗，既然世界唔同咗，就唔可以用舊方法去做，要將佢轉變再傳承。」
撰文：小米
場地提供：Pizza Express（又一城）
from:
http://hk.apple.nextmedia ... 160220/19498165
