林保怡早前憑《掌上明珠》喺新加坡嘅「第十五屆亞洲電視大獎」攞咗最佳男主角獎，成為亞洲視帝，認真威水。不過事前香港冇乜人知亦冇乜人提，要到佢喺新加坡拎完獎，返到香港機場撞到馮仁昭自爆係亞洲視帝先有人知，無綫竟然冇反應，保怡梗係有啲不滿喇！
事隔一個月都未有任何慶祝活動，噚日保怡喺電視城古裝街為《九江意醲》開鏡拜神，佢笑話：「公司出咗張通告畀我，話13號有個活動，話係畀一班海外得獎嘅同事出席，咁樣咪當畀個機會我講多一次，見一見大家囉！攞咗嗰個獎係好多唔同東南亞國家，日本、韓國、印度等地嘅演員一齊比賽嘅。」不過無綫今日也在電視城補辦祝捷會作安撫。
貴為亞洲視帝林保怡揚言不會加價，佢話：「最緊要劇本，搵到好劇本好角色，可能減價。」不過，亞洲視帝聽到吳卓羲最近同其他國家角逐有線頒獎禮嘅最佳男主角獎，佢笑住話：「玩嘢呀！吳卓羲約滿咩？咁對方都幾識宣傳喎！」
同劇仲有薛家燕、陳錦鴻、鍾嘉欣、敖嘉年、樂瞳、馬賽，佢哋今次拍呢個劇《九江意醲》係同酒有關，遲少少仲會上去九江拍外景，鍾嘉欣就話自己好彩唔使飲酒，佢係劇入面就扮演一個長短腳嘅女仔，佢話：「我本身唔識飲酒，又好彩唔使我飲，只係做一個長短腳嘅女仔，又想搵老公，最後搵到陳錦鴻唔介意我嘅缺陷要咗我！」
from:
http://hk.apple.nextmedia ... art_id=14859528
