無綫節目《荃加福祿壽》由電視搬上舞台，終於可以實現喇。喺12月4號同5號，汪明荃（阿姐）、阮兆祥、王祖藍同李思捷會喺灣仔會展搞個「荃加福祿壽宇宙最長演唱會」，噚日佢哋就喺將軍澳電視廣播城開記者會。記者會場地搞到好似星球大戰咁，三個扮嘢王以黑白灰軍裝出場，再介紹大紅花頭夾紅色格仔褲嘅阿姐登場，真係有別於無綫一般記者會，原來今次個演唱會監製係早前被扣查後獲撤銷保釋嘅錢國偉（Wilson），唔怪得咁多花臣啦！
離開無綫後，Wilson第一次以兼職身份幫無綫搞騷，佢話無綫冇叫佢回巢，自己又冇諗過返無綫，佢話：「我都係想自由身出去博一博，不過之後都會freelance接無綫嘢做，會拍邵氏有份投資嘅電影。」出面人工高，收入好，難怪Wilson無心回流，笑住話自己跑嚟跑去人工梗會高少少。
出年多幾個免費電視頻道，有消息話有公司高薪挖角，Wilson都覺得開心：「我都戥好多同事開心，大家身價都高咗，辛苦都有價值。」
福祿壽盼有Part II
今次Wilson搞福祿壽音樂會，一定絞盡腦汁為自己打響劫後頭炮，祥仔話橋已經有，除咗福祿壽嘅經典扮相，仲會加新嘢，佢話：「有四個嘉賓已經應承咗會嚟，到時我哋都會扮佢哋。」佢哋更表明絕對唔會加場，祖藍話：「冇得加，太爆喇，之前搵個場都搵咗好耐，先搵到星期六日，我哋觀眾都係家庭客，如果好反應，希望可以有Part II啦。」
