亞視上年停播，就連每年舉辦的亞洲小姐都因財困被迫在15年玩完，不過對選美唸唸不忘大有人在，來自四川，13年大熱倒灶的有米王錦睿（Regine），今年一擲四百萬，為興趣變身做話事人，在香港搞選美比賽《Miss Amazing Hong Kong 2017》，更遊說同屆落選亞姐再參選玩多一次，原來Regine希望同人分享當年選美心情。
水力發電廠太子女
現年二十六歲的王錦睿，參選亞姐時以34C逼爆身材奪得「時尚風格」同「魅力」大獎，不過未能順利進入三甲，相隔四年，她自掏腰包掟四百萬搞比賽。有米Regine家人在四川經營水力發電廠，太子女生活悠閒，這幾年住在香港的她，出席活動外，得閒更會周圍飛，生活富泰。
今次搞選美，她請了一班好友包括錢國偉、許願、Sunny Wong（星級排舞師王國榮）等擔任評判，又找來一三年做亞姐選美的導演再出手，倒模亞姐選舉形式。錢國偉笑她：「你係咪唔抵得冇咗亞姐？要搞番一個同亞姐style一樣嘅，到時可以搵埋楊恭如返嚟捧場。」
錢國偉同Regine飲住紅酒講搞選美，被問係咪為興趣，Regine點頭稱是。
自己掟錢搞選美，Regine請來錢國偉同Sunny Wong做評判。
經常四川香港兩邊飛，Regine會坐商務位返屋企探親。
在香港shopping，Regine是CHANEL常客。
由於人脈廣，Regine擔任泰國私人飛機MTX代言人。
Regine經常將生活照放上網，其中有她揸住價值約400萬的林寶堅尼出外遊車河。有亞姐再參選
錢國偉指每人興趣不同，有人愛買車買樓，她卻鍾意攞錢出嚟搞選美。Regine解釋：「我都係愛靚嘅女仔，有過選美經驗，同埋想分享嚇心情。」錢導演質疑她當年是否選唔到而深深不憤，她承認並反問：「如果我今年參加，你會唔會揀我做冠軍？」
既然可以話事，Regine寧願升呢做總指揮：「我哋傾緊電視版權，贏咗冠軍嘅女仔有廿八萬獎金，仲會同佢簽約拍電影或者唱歌。」
選美有癮，其中例子有八七年亞洲姐季軍黃景珍，原來在八五年選過大台舉辦的健美小姐並獲第五名。Regine自言也有遊說同屆落選女仔再參選：「我諗都有一個亞洲小姐會嚟選，不過而家唔可以講係邊個。」
雖是為興趣，不過Regine對第一炮好有信心，更認為有商機成為一盤賺錢生意：「我有信心搞得好，如果第一屆掂咗，我會一路做落去，同埋會返內地搞比賽，朋友都話有興趣投資。」
傳奇亞姐葉玉卿可謂最勇亞姐，拋下選美光環拍三級片，之後又嫁到有錢老公，擁私人飛機更開埋銀行。
宮雪花九五年以47歲高齡參加選美，憑好身材和高學歷，成為當年頂頭大熱。
本來是闊太的羅霖，離婚後再戰娛圈，身材弗爆的她出完寫真，又在無線古裝大劇孭重飛，五十歲依然keep住好狀態。
八七年亞姐黃景珍（右二），曾經參選八五年大台搞的健美小姐，雖然獲第五名，但隔兩年又再選，對選美好熱衷。富貴老豆錫女 07年亞姐冠軍張家瑩零用錢幾十萬
亞姐出名多有米女，○七年亞姐冠軍張家瑩，多年來攞住亞視萬幾蚊人工生活，不過好彩老豆搞建築生意，最初入行時，更會識做每年俾幾次零用錢乖女，每次三十至五十萬，無限支持。
一四年亞視財困幾乎零製作，富家女張家瑩唔再坐住等，自己創造機會，投資過千萬在銅鑼灣世貿開了日本餐廳和泰國餐廳做老闆娘。
「餐廳第一年已經回本，呢兩年都賺錢，好多行家都知做飲食業多勞多得，有一輪我會衝鋒陷陣拍嘢，身體心靈都keep住嗰個狀態，而家就完全投入做餐廳，不過近排都客串咗（黃）子華套戲，佢話個角色啱我，做個好艷麗嘅包租婆。」
以前在亞視都是主持旅遊及飲食節目，每月最多只有一星期留港，張家瑩說：「我會勁shopping買衫買鞋，之前搬屋，我先掉咗七十對鞋。」買衫買鞋外，近年更會買珠寶鑽石保值，訪問當日，她手上戴的粉紅鑽戒就價值幾百萬。
張家瑩接受訪問當日，手上戴著的粉紅鑽戒價值幾百萬。
張家瑩有富貴老豆撐腰，她在亞視是打風流工。
張家瑩在亞視時拍旅遊特輯居多，跟陳啟泰算是當時最佳組合。
姚佳雯當年選美已經是超班馬，有樣有身材。
跟陳展鵬拍拖數年，姚佳雯大部分時間都是做背後的女人，十分低調。有米亞姐逐個捉
嫁得好的有米亞姐，除了人所共知利智嫁李連杰，其他亦有深明樹大招風，故大多愈來愈低調，甚至淡出娛圈唔再玩。
朱慧珊
朱慧珊有兩段婚姻，第一段唔夠十個月就離婚。第二任老公賈鈞鵬，兩人97年拍拖，拍足11年，08年於關島註冊。賈鈞鵬在香港有五間公司，單是在港物業已值逾億，連同北京四合院及上海豪宅，約值五億。賈鈞鵬旗下公司，除經營羽絨、皮草、地產、成衣等生意，因眼光準，投資地產時有斬獲，身家亦愈來愈豐厚，跟內地不少富商高官關係密切的他，官場人脈甚廣，朱慧珊亦經常獲邀參加或主持解放軍在港活動。
姚佳雯
08年亞姐冠軍姚佳雯，樣靚身材好，有指家底厚的她，當年為要跟仍在亞視拍劇，發展平平的陳展鵬爭取見面機會，索性來港參選亞姐，奪冠後，更留在亞視發展，不過陳展鵬過檔無線走紅後，二人亦宣佈分手，姚佳雯返家鄉西安，12年低調跟西安李姓地產富豪結婚。
許瑩
09年亞姐冠軍許瑩，11年嫁圈外有米男友鄭曉東。有指鄭曉東是內地太子黨，家人有權有勢，深圳有幾間酒店，婚後許瑩索性做富太，長居深圳。
撰文、攝影、攝錄：娛樂組
