南非世界盃殺埋身，夜麻麻睇波梗係要買啲即食麪祭吓五臟廟。小妹唔想食到咁肥，買麪嗰陣都會睇吓啲包裝上嘅營養標籤，揀啲能量同脂肪冇咁高嘅麪嚟食。小妹以為easy job啦，比較吓唔同麪嘅營養成份含量有幾難？小學生都識睇數字啦，但估唔到有啲麪商打茅波，喺營養標籤做手腳，誤導消費者。
拆解能量玄機
消委會老友同小妹講，營養標籤會列出嘅營養成份，以食用份量（serving size）計算，但食用份量係由生產商自己定啲，有啲麪商咪乘機打吓茅波，誤導巿民以為佢哋啲麪比其他牌子健康。消委會巡查所見，好似A麪嘅淨重量係90克，但佢用嘅食用份量以45克做單位，所以每個食用份量嘅能量係220千卡。B麪嘅淨重量係86克，食用份量用番86克做單位，得出嘅係344千卡。驟眼睇，A麪嘅能量比B麪少咗36%，好似健康啲咁。但一般人食麪唔會食一半，會食成個，即係90克，所以A麪嘅能量應該係220×2千卡，即係440千卡，反比B麪高出近100千卡。
老友又話，如果兩款麪嘅食用份量差別好大，好難直接比較，咁就要做一啲換算嘞。又用B麪嚟計，食用份量86克，能量344千卡；C麪食用份量75克，能量335千卡。換算方法係將C麪嘅335千卡除以75，再乘番B麪嘅86克，得出384千卡。C麪嘅能量比B麪高40千卡。
老友話，大家能量一樣，可以比較佢哋總脂肪、飽和脂肪同鈉嘅含量，含量越少梗係越健康啦。
http://hk.apple.nextmedia ... ;cat_id=7349340
