黎耀祥祥仔被外界不斷吹捧，令佢都忍唔住話：「搞到我當正自己係視帝！」為咗封帝呢個歷史性一刻，祥仔近月積極備戰，勤做纖體機，實行以38吋胸肌最佳狀態攞獎。而坐定粒六攞女配角嘅心姐，就搵定過億珠寶贊助，再勁跳拉丁八字舞修腰，務求靚盡全場。
經過4個月的全身大改造，祥仔前所未有咁fit，腹肌重現，相信12月4日頒獎禮當晚，祥仔將可以最佳狀態攞視帝。
祥仔黎耀祥近期既要拍《畢打自己人》，亦忙於出席不少宣傳活動，但為操fit身形出席頒獎禮，亦不時抽空到自己代言嘅MENCE纖體美容院做機。
本周一（30日）祥仔唔使開工，即邊做機邊接受本刊訪問，祥仔說：「太太Julia一直覺得演員係應該執靚外形，我唔係唔認同大家想睇靚嘢，但我以前想俾觀眾睇我內在先，認同咗我嘅實力先至再執外表。自從『柴九』一角後，真係多咗好多見人嘅機會，依家瘦咗睇落後生啲，外形靚啲，演嘅角色都可以多啲選擇啦！」
減肥前豬八戒身形
4個月前，祥仔體重達160磅，全身豬腩肉，仲有個豬八戒肚腩。
12月1日全身美容
祥仔做嘅美容療程真係由頭做到落腳，除咗用光學儀器提升胸肌外，仲用太空氣壓儀幫腳部通淋巴。
祥仔狂減5吋豬腩肉
去年以7位數字成為MENCE纖體美容院代言人的祥仔，4個月前開始的起心肝狂做機，結果胸肌由36.5增至38吋，肥肚腩由35吋減到30吋，整體磅數由160磅減至143磅，成績驕人。祥仔攞視帝當日，大可勁晒柴九胸。
頒獎禮即將來臨，問準視帝祥仔的心情，他竟然表示好麻木：「真係冇乜特別感覺，有啲麻木，可能呢排出席太多活動，大家又猛恭喜我，搞到我當正自己係視帝！到時如果真係攞獎，可能未必有舊年攞男配角獎咁激動。」
雖然外界認定祥仔攞硬視帝，但他亦打定輸數，「冇嘢係十拿九穩，我都有心理準備大熱倒灶，始終會有政治因素影響，有好多商業考慮，呢個世界從來都冇公平。講真我覺得攞唔攞獎唔係咁重要，最重要係背後嘅意義，我嘅工作表現同工作態度，得到大家咁高嘅評價，呢啲先至係我最珍惜。」
祥仔9成9贏面
記者瀏覽過無綫官方網以及香港討論區，發現有9成以上嘅網友都支持祥仔攞視帝，有網友話柴九hit成咁一定sure win，如果攞唔到就一定係TVB造馬㖭！
