將會喺呢個星期日舉行嘅《2009亞洲小姐競選總決賽》，12位準亞姐將競逐冠軍寶座，噚日12位佳麗就去咗九龍灣進行瘦身測試同分析，競逐完美體態大獎同晶瑩肌膚大獎。12位佳麗着住lowcut短裙出現，雖然同比賽當晚嘅服飾相比已經算收斂，不過仍然有人賣大包，嚟自內地嘅15號許瑩凸點，認真失策，最後由擁有34D導彈上圍嘅18號劉伊心即場攞咗完美體態大獎，晶瑩肌膚大獎就喺總決賽當晚公佈。
今次大會指定啲美容及纖體顧問公司嘅代言人係周秀娜，劉伊心被問到識唔識周秀娜，佢用普通話話：「在香港看廣告時認識，她曝光率真很高。」跟住又同劉伊心話似乎周秀娜嘅身材好啲，佢笑笑口話：「對呀，我要好好豐胸。」
傳冠軍內定
講到有消息話嚟自山東嘅9號李雪婷，因為零是非兼樣靚身材好，於是乎被指為內定冠軍，點知佢聽完就用普通話好有自信咁話：「我覺得這手法不對，我沒有任何感受，我覺得做人低調一點比較好，所以不想被牽涉入內，我希望決賽當晚可以好好比賽。」既然覺得低調一點比較好，又何解會參加比賽？佢話：「我不是因為高調才參加，我只想鍛煉自己。」
