星期日同星期一（十月二十八及二十九）亞視連環發功，公布亞姐港澳賽區以及亞洲先生海外賽區入圍名單。
雖然剔走一班騎呢醜男醜女，不過亞姐亞男都各有驚人發現。先講亞姐，班候選佳麗靚唔靚見仁見智，不過(5)齊真晨個樣真係有七分似謝安琪，至於佳麗中年齡最大、已經三十一歲嘅(8)于建茹剪短把頭髮之後，愈望愈似台灣女藝人楊謹華，連當事人都話有某啲角度同對方餅印一樣。
嫩版謝安琪：個樣成日變嘅謝安琪，同(5)齊真晨真係好似樣，尤其係個鼻，同樣直過把間尺。膠版楊謹華：塊面硬到唔係好識郁嘅(8)于建茹，同傳聞整容整上癮嘅楊謹華有八成相似。
鬥可愛：烏克蘭參賽者(13)尤里，不斷四十五度角斜眼發電，來自台灣嘅(24)張新威，成六呎高，鍾意學妹妹仔扮可愛。毀容版高寧：肥大肉厚嘅許麗莉，身高五呎八，佳麗中最高，亦都最重最肥，有一百二十八磅，個樣同心口肉，同高海寧有三分似，不過係毀容嗰隻！
至於班亞男，初賽面試著咗條激凸泳褲、來自烏克蘭嘅(13)尤里，順利進入海外賽區七強，雖然生得唔高，但勝在自信心爆高，影相放晒電；不過強中自有強中手，來自台灣(24)張新威，一出台扮cool，再變招台灣妹妹仔擺晒得意甫士，一樣攞你命！
