羅霖（Candy）係亞姐冠軍級人馬，上年尾亞視搵佢做導師，教應屆亞姐禮儀，Candy仲喺微博興奮自爆會做亞姐選舉嘅評判。本來事先張揚係無問題嘅，𤓓就𤓓在周一（21日）亞姐決賽，成班評判見記者，但竟然無Candy份囉！
媽咪姐八到係亞視最後覺得Candy唔適合喎，你問點解？唉，仲有乜點解吖，佢近期嘅離婚同北京會嫩男新聞幾咁「震撼」先得㗎！所以話，見報多係無用嘅，藝人形象真係好緊要。
上年12月尾，羅霖喺微博宣傳亞姐選舉，又話自己會做「公平和公正的評委」，點知轉頭已被飛。做人呢，真係唔好太高調！
今屆亞姐冠軍係台灣人陳彥蓉（中），亞軍係港澳代表齊真晨（左），季軍係印度佳麗古拉高華（右），果然非常亞洲化。
亞視老闆王征、高層葉家寶同羅霖死敵黎燕珊、有份做評判嘅荷里活明星尚格雲頓及「無綫代表」港男翟威廉大合照。羅霖呢？影都無囉！
