雖然羅霖帶病上陣，但仍谷胸大騷身材。
羅霖、鄭明明同張文慈噚日喺粉嶺為美容院開幕擔任剪綵嘉賓，爆乳上陣嘅羅霖話因為拍劇，所以消瘦唔少：「我第一次拍古裝，真係拍到七勞八傷，因為古裝要戴假髮，搞到甩頭髮，加埋我病咗食啲好勁嘅消炎藥頂住，𠵱家變咗慢性喉炎，不過都拍得好開心，台前幕後做晒好朋友。」
之後羅霖又主動提到近日有關同性婚姻嘅報道，佢話：「我係基督徒，其實我身邊都有好多同性戀朋友，但講到同性結婚，我唔會反對不過唔會接受，如果好多國家都通過，我覺得係顛倒咗個傳統。」佢話有好多國家甚至由「父母」改成「雙親」：「我比較傳統會覺得好亂，不過如果你問我啲仔係同性戀會點，我都要體諒，冇辦法啦。但我兩個仔都比較傳統，覺得（同性婚姻）好奇怪，反而大仔喺美國，就會知道世界有好多種唔同嘅愛。」
鄭明明（左）同張文慈噚日為美容院開幕擔任嘉賓。
張文慈演家姐
另外，露背又露腿嘅張文慈早前喺橫店拍古裝劇，之後又再接到新劇：「新劇我會做馬德鐘家姐，以前拍戲，做過黃浩然阿媽㖭，今次算年輕咗，我哋演員嚟㗎嘛，都冇所謂。」
撰文：馮仁昭
from:
http://hk.apple.nextmedia ... 170725/20100294
