年過半百的羅霖身形依然弗爆，她坦言打泰拳是為了減壓。
曾被英國《每日郵報》（Dailymail）以「靚到不能相信」形容的51歲羅霖（Candy），剛於泰國拍戲返港，身形比之前又弗了。她指今次要拍打戲十分辛苦，由於全程著皮衫皮褲拍攝，如焗桑拿一樣，令她短短十幾日便瘦了6、7磅，她說：「拍打戲真係好辛苦，日日開工好似軍訓咁，而且每日全身都會濕到滴出水，但原來咁樣係一個好好嘅發洩機會，所以返嚟即刻搵老師學打拳。」
羅霖早前到泰國拍戲打到飛起，她說連揸飯碗都手震。
羅霖找來世界級拳王杜恆霖教她打泰拳，有板有眼。
被讚有潛質
為了認真學習，Candy專誠找來世界級拳王兼有「風之子」之稱的杜恆霖（Bryan）親自教授，當日Bryan主要教Candy一些打泰拳基本動作，包括如何出拳、防禦及如何控制力度等。Candy表示：「其實二仔都有學打拳，我都好支持佢嘅，但估唔到自己都鍾意咗，出一身汗，成個人都精神咗。」Bryan亦大讚Candy有潛質，有姿勢有實際。不過，今年Candy工作忙個不停，問她何時可放長假休息？她謂：「最快要明年初先有機會，因為稍後要做舞台劇，又要返大陸做商演，暫時都冇得放假。」
另外，昨日有雜誌報導指Candy與前奶奶關係以前一向不好，故不敢去靈堂鞠躬，更傳她連花牌都沒有送。不過本報昨日獲讀者提供一張拍自靈堂的相片，相中明顯見到Candy送到靈堂的花牌，Candy接受本報電話訪問時，語帶哽咽說：「其實我好無奈，一件咁難過嘅事會搞成咁。同埋我唔係報導所講，點解要人邀請先去，我嘅情況係唔同，始終我係一個不受歡迎人物，前奶奶一向唔鍾意娛樂圈嘅女仔，我都透過囝囝問我可唔可以去，咁人哋唔想，我唔想去到俾人趕出嚟。」
採訪：小米
攝影：陳志嵐
場地：FFG武術健身中心
羅霖透過囝囝口中得悉，前夫劉坤銘（圖）不欲她現身前老爺喪禮。
資料圖片
前老爺舉行喪禮當日，羅霖曾送上花牌致以慰問。讀者提供圖片
From:
http://hk.apple.nextmedia ... 151105/19359930
